ന്യൂഡൽഹി: ആരോഗ്യമന്ത്രി വീണാ ജോർജ് വീണ്ടും ഡൽഹിയിൽ. ഇന്ന് രാവിലെ 11 മണിക്ക് ഡൽഹിയിലെത്തിയ മന്ത്രി അവിടെ നിന്നും കേരള ഹൗസിലേക്ക് പോകും. ഉച്ചയ്‌ക്ക് ശേഷം 2.30ഓടെ കേന്ദ്ര ആരോഗ്യമന്ത്രിയുമായി കൂടിക്കാഴ്‌ച നടക്കുമെന്നാണ് വിവരം.
കഴിഞ്ഞ തവണ ക്യൂബൻ സംഘത്തെ കാണാൻ ഡൽഹിയിലെത്തിയ ആരോഗ്യമന്ത്രി, കേന്ദ്രമന്ത്രി ജെപി നദ്ദയുമായി കൂടിക്കാഴ്‌ചയ്‌ക്ക് സമയം തേടിയിരുന്നെങ്കിലും പാർലമെന്റ് നടക്കുന്ന സമയമായതിനാൽ ലഭിച്ചില്ല. തുടർന്ന് രണ്ട് നിവേദനങ്ങൾ ആരോഗ്യമന്ത്രി കേന്ദ്രമന്ത്രിയുടെ ഓഫീസിൽ നൽകിയിരുന്നു. ആശമാരുടെ ഇൻസെന്റീവ് വർദ്ധിപ്പിക്കണമെന്നാണ് ഇതിൽ ആവശ്യപ്പെട്ടിരിക്കുന്നത്. 2023- 24സാമ്പത്തിക വർഷത്തിൽ തടഞ്ഞുവച്ച 637 കോടി രൂപ എത്രയും വേഗം നൽകണം, എയിംസ് അനുവദിക്കണം, കാസർകോടും വയനാടും മെഡിക്കൽ കോളേജിന് സഹായം നൽകണം തുടങ്ങിയ ആവശ്യങ്ങളാണ് നിവേദനത്തിലുള്ളത്. ഈ കാര്യങ്ങൾ ഇന്നത്തെ ചർച്ചയിലും മുന്നോട്ട് വയ്‌ക്കുമെന്നാണ് കരുതുന്നത്.