ന്യൂഡൽഹി: രാജ്യത്ത് സാധാരണക്കാരുടെ കുടുംബ ബഡ്ജറ്റ് താളംതെറ്റിച്ചുകൊണ്ട് ഗാർഹിക പാചകവാതക (LPG) വില വീണ്ടും വർധിപ്പിച്ചു. വീട്ടാവശ്യത്തിനുള്ള 14.2 കിലോ ഗ്രാം സിലിണ്ടറിന് 29 രൂപയാണ് കേന്ദ്ര പൊതുമേഖലാ എണ്ണക്കമ്പനികൾ കൂട്ടിയത്. പുതുക്കിയ നിരക്കുകൾ ജൂൺ 7 മുതൽ നിലവിൽ വന്നു. മൂന്ന് മാസത്തിനിടെ ഇത് രണ്ടാം തവണയാണ് ഗാർഹിക എൽപിജി വില കൂട്ടുന്നത്. ഇതിനു മുൻപ് കഴിഞ്ഞ മാർച്ച് 7-നായിരുന്നു സിലിണ്ടറിന് 60 രൂപ വർധിപ്പിച്ചിരുന്നത്.
വില വർധനവോടെ കേരളത്തിലും പാചകവാതക നിരക്ക് കുതിച്ചുയർന്നു. തിരുവനന്തപുരത്ത് ഉൾപ്പെടെ സംസ്ഥാനത്ത് സിലിണ്ടർ വില ഇപ്പോൾ 951 രൂപ കടന്നിരിക്കുകയാണ്. ദേശീയതലത്തിൽ, ഡൽഹിയിൽ സിലിണ്ടർ വില 913 രൂപയിൽ നിന്നും 942 രൂപയായി ഉയർന്നു. പശ്ചിമേഷ്യയിലെ സംഘർഷങ്ങളെത്തുടർന്ന് ആഗോളതലത്തിൽ എണ്ണ-വാതക വിതരണത്തിലുണ്ടായ തടസ്സങ്ങളാണ് ഈ വിലവർധനവിന് പ്രധാന കാരണമായി ചൂണ്ടിക്കാണിക്കപ്പെടുന്നത്.
പശ്ചിമേഷ്യൻ പ്രതിസന്ധി തുടങ്ങിയ ശേഷം ഗാർഹിക സിലിണ്ടറുകൾക്ക് ആകെ 89 രൂപയോളമാണ് വർധിച്ചിട്ടുള്ളത്. നിലവിലെ വർധനവിന് ശേഷവും ആഭ്യന്തര വിപണിയിൽ ഒരു സിലിണ്ടറിന്മേൽ എണ്ണക്കമ്പനികൾക്ക് 700 രൂപയോളം നഷ്ടം വരുന്നുണ്ടെന്നാണ് ഔദ്യോഗിക വൃത്തങ്ങൾ വ്യക്തമാക്കുന്നത്. അടുത്തിടെ പെട്രോൾ, ഡീസൽ, സിഎൻജി നിരക്കുകളിലുണ്ടായ വർധനവിന് പിന്നാലെ പാചകവാതകത്തിനും വിലകൂടിയത് സാധാരണക്കാരായ ജനങ്ങൾക്ക് മേൽ വലിയൊരു പ്രഹരമായി മാറിയിരിക്കുകയാണ്.