(റോഹ്തക്ക്) ഹരിയാന: ഏഴുമാസം ഗർഭിണിയായ 19-കാരിയെ കാമുകനും സഹൃത്തുക്കളും ചേർന്ന് കൊന്നു കുഴിച്ചുമൂടി. ഹരിയാനയിലെ റോഹ്തക്കിലാണ് സംഭവം. സമൂഹമാധ്യമത്തിൽ സജീവമായ പടിഞ്ഞാറൻ ഡൽഹിയിലെ നംഗ്ലോയ് സ്വദേശിനി സോണി(19)യാണ് അതിദാരുണമായി കൊലചെയ്യപ്പെട്ടത്.
സംഭവത്തിൽ സോണിയുടെ കാമുകൻ സലീം എന്ന സഞ്ജുവിനെയും സുഹൃത്തിനെയും അറസ്റ്റ് ചെയ്‌തെന്നും മറ്റൊരാൾക്കായി അന്വേഷണം തുടരുകയാണെന്നും പോലീസ് പറഞ്ഞു.
കഴിഞ്ഞ തിങ്കളാഴ്ചയാണ് സലീമിനെ കാണാനെന്നു പറഞ്ഞ് സോണി വീട്ടിൽനിന്ന് പോയത്. എന്നാൽ, അവിടെ നിന്ന് കാമുകനും സുഹൃത്തും ചേർന്ന് സോണിയെ ഹരിയാനയിലേക്ക് കൊണ്ടുപോകുകയായിരുന്നു. ശേഷം സോണിയെ വിളിച്ചിട്ട് കിട്ടാതായതോടെ, കാണാനില്ലെന്ന് വീട്ടുകാർ പോലീസിൽ പരാതിപ്പെടുകയായിരുന്നു. തുടർന്നുള്ള അന്വേഷണത്തിലാണ് യുവതിയെ കൊന്ന് മൃതദേഹം കുഴിച്ചുമൂടിയ നിലയിൽ കണ്ടെത്തിയത്.
സലീമും സോണിയും തമ്മിൽ പ്രണയമായിരുന്നു. ഗർഭിണിയായതോടെ വിവാഹം കഴിക്കാൻ സോണി സലീമിനെ നിർബന്ധിച്ചിരുന്നു. എന്നാൽ വിവാഹത്തിന് താൽപര്യം കാണിക്കാതെ സലീം, കാമുകിയോട് ഗർഭഛിദ്രം നടത്താൻ ആവശ്യപ്പെടുകയായിരുന്നു. ഇതേച്ചൊല്ലിയുള്ള തർക്കമാണ് കൂട്ടുകാരുമായി ചേർന്നുള്ള യുവതിയുടെ കൊലപാതകത്തിൽ കലാശിച്ചതെന്നാണ് പോലീസ് പറയുന്നത്.
സലീമുമായുള്ള ബന്ധം സോണിയുടെ വീട്ടുകാർക്ക് അറിയാമായിരുന്നുവെന്നും അവർ ബന്ധം വിലക്കിയെങ്കിലും തുടരുകയായിരുന്നുവെന്നും പോലീസ് പറഞ്ഞു. സലീമിനൊപ്പമുള്ള നിരവധി ചിത്രങ്ങൾ കൗമാരക്കാരി സമൂഹമാധ്യമത്തിൽ പോസ്റ്റ് ചെയ്തിട്ടുണ്ട്. ഇരുവരും സൗഹൃദത്തിലായപ്പോൾ പ്രതി മറ്റൊരു പേര് ഉപയോഗിച്ചിരുന്നതായി ഇരയുടെ ഭർതൃസഹോദരൻ പറഞ്ഞു. മൂവർ സംഘമാണ് കൊലക്കു പിന്നിലെന്നാണ് പോലീസിന്റെ പ്രാഥമിക കണ്ടെത്തൽ.