ഭോപ്പാല്– അവര് നല്ല ആളുകളാണ്, സമ്മാനത്തുക എന്തായാലും ലഭിക്കുമെന്നാണ് പുഷ്പലത ഇപ്പോഴും വിശ്വസിക്കുന്നത്. മധ്യപ്രദേശിലെ ജബല്പൂരിലെ ബാര്ഗി പ്രദേശത്തെ ആശാ വര്ക്കറാണ് പുഷ്പലത ഝാരിയ. ഗ്രാമീണരെ ശുശ്രൂഷിക്കുകയും രണ്ട് കുട്ടികളും ഭര്ത്താവുമായി സന്തുഷ്ട ജീവിതം. 2025 മാര്ച്ചില് വന്ന ഒരു ഫോണ് കോളിന് ശേഷമാണ് പുഷ്പലതയുടെ ജീവിതത്തിന്റെ താളം തെറ്റാന് തുടങ്ങിയത്. ഒരു വിദേശറ നമ്പറില് നിന്ന് മെഗാ ലോട്ടറി വിജയിച്ചെന്ന് പറഞ്ഞ് വന്ന ഫോണ്കോള്. കേട്ടയുടന് സമ്മാന കഥ വിശ്വസിച്ച പുഷ്പലതയെ തട്ടിപ്പുകാര്ക്ക് ചൂഷണം ചെയ്യാന് എളുപ്പമായിരുന്നു. സമ്മാനം ലഭിക്കണമെങ്കില് തങ്ങള് പറയുന്ന തുക പ്രൊസസിങ് ഫീസായി അടക്കണം. ഒട്ടും ആലോചിക്കാതെ പുഷ്പലത പണം അയച്ചു നല്കി.
എന്നാല് ഇതോടെ തീര്ന്നില്ല. പിന്നെയും ഫോണ് വിളികള് വന്നു. ലോട്ടറി സമ്മാനം അയച്ച കൊറിയര് പിടിച്ചെടുത്തെന്നും അതില് പുഷ്പലതയുടെ ആധാര് കാര്ഡ് ഉണ്ടായിരുന്നെന്നും കൂടുതല് പണം നല്കിയില്ലെങ്കില് പിടിക്കപ്പെടുമെന്നും അവര് ഭീഷണിപ്പെടുത്തി. ഭയന്നതിനാല് പിന്നെയും നാല് ലക്ഷത്തോളം രൂപ അയച്ചുകൊടുത്തു. പരിചയക്കാരില് നിന്നും ബന്ധുക്കളില് നിന്നും കടം വാങ്ങിയാണ് ഈ പണം നല്കിയത്. വീട്ടുകാരില് നിന്നും നാട്ടുകാരില് സമ്മാനത്തിന്റെ കാര്യം രഹസ്യമാക്കിവെക്കണമെന്ന് തട്ടിപ്പുകാര് പ്രത്യേകം ആവശ്യപ്പെട്ടിരുന്നു. ഇല്ലെങ്കില് സമ്മാനം റദ്ദാക്കുമെന്നും ഭീഷണിപ്പെടുത്തി.
ഏപ്രില് 23നാണ് ആരുമറിയാതെ പുഷ്പലത വീടു വിട്ടിറങ്ങിയത്. അലഞ്ഞു തിരിഞ്ഞ് പലയിടത്തായി കിട്ടുന്ന പണികളെല്ലാം ചെയ്തു. സമ്പാദിക്കുന്ന പണം തട്ടിപ്പുകാര് പറയുന്ന കഥകള് വിശ്വസിച്ച് അയച്ചു കൊടുത്തുകൊണ്ടേയിരുന്നു. വജ്രവും സ്വര്ണവും പത്ത് ലക്ഷം രൂപയുടെ സമ്മാനം ഉണ്ടെന്നാണ് തട്ടിപ്പുകാര് പുഷ്പതയെ വിശ്വസിപ്പിച്ചത്. ഇതിനിടയില് ജൂണ് മാസത്തില് ഇവരെ ഭീഷണിപ്പെടുത്തി കരയിപ്പിച്ച് ഷൂട്ട് ചെയ്ത വീഡിയോ ഭര്ത്താവിന് അയച്ച് ഭാര്യ തട്ടിക്കൊണ്ടു വന്നിരിക്കുകയാണെന്നും മോചനദ്രവ്യമായി രണ്ട് ലക്ഷം രൂപ ആശ്യപ്പെട്ടു. പണം നല്കിയില്ലെങ്കില് ഭാര്യയെ കൊന്ന് മൃതദേഹം കഷ്ണങ്ങളാക്കി കാട്ടില് കളയുമെന്ന് ഭീഷണിപ്പെടുത്തി. ഇത് കുടുംബത്തെ ഒന്നാകെ തളര്ത്തി.
പിന്നീട് പുഷ്പലതയുടെ അമ്മ മധ്യപ്രദേശ് കോടതിയില് ഹേബിയസ് കോര്പസ് ഹരജി ഫയല് ചെയ്യുകയും പോലീസ് അവരെ കണ്ടെത്തുകയും ചെയ്തു. പക്ഷെ അപ്പോഴും സമ്മാനത്തുക ലഭിക്കുമെന്ന് പുഷ്പലത ഉറച്ച് വിശ്വസിച്ചിരുന്നു. അവര് നല്ലവരാണെന്നാണ് പോലീസിനോടുള്പ്പെടെ പറഞ്ഞപ്പോള് സംഭവത്തില് പന്തികേട് തോന്നിയത്. പരിശോധനയില് പുഷ്പലതയുടെ മാനസിക നില തെറ്റിയിരിക്കുകയാണെന്ന് മനസ്സിലായി. ഇവര്ക്കിപ്പോള് കൗണ്സിലിങ് നല്കി വരികയാണെന്ന് പോലീസ് അറിയിച്ചു. തട്ടിപ്പുകാര് വിദേശത്തു നിന്നുള്ള ഐ.പി അഡ്രസ് ഉപയോഗിച്ചതിനാല് പ്രതികളെ കണ്ടെത്തുകയെന്നത് ബുദ്ധിമുട്ടാണ്, പ്രതികള്ക്കായുള്ള തിരച്ചില് നടക്കുന്നുണ്ടെന്നും പോലീസ് പറഞ്ഞു.