ഗാസിയാബാദ്– ഉത്തർപ്രദേശിലെ ഗാസിയാബാദിൽ രാജ്യവ്യാപകമായി വലിയ പ്രതിഷേധങ്ങൾക്ക് ഇടയാക്കിയ 17-കാരൻ സൂര്യ പ്രതാപ് ചൗഹാന്റെ കൊലപാതകത്തിലെ മുഖ്യപ്രതി പൊലീസ് ഏറ്റുമുട്ടലിൽ കൊല്ലപ്പെട്ടു. ഖോഡ സ്വദേശിയായ അസദ് ആണ് ശനിയാഴ്ച അർധരാത്രിയോടെ ഉണ്ടായ വെടിവെപ്പിൽ കൊല്ലപ്പെട്ടത്. കഴിഞ്ഞ ബക്രീദ് ദിനത്തിലായിരുന്നു സൂര്യ ചൗഹാനെ അസദിന്റെ നേതൃത്വത്തിലുള്ള സംഘം ക്രൂരമായി കുത്തിക്കൊലപ്പെടുത്തിയത്.
പൊലീസ് നൽകുന്ന വിവരങ്ങൾ പ്രകാരം, ഒളിവിൽ പോയ അസദ് നഗരം വിടുന്നതിനായി സുഹൃത്തിൽ നിന്നും പണം വാങ്ങാൻ ഖോഡ പ്രദേശത്ത് എത്തുന്നുണ്ടെന്ന രഹസ്യവിവരം ഗാസിയാബാദ് പൊലീസിന് ലഭിച്ചിരുന്നു. ഇതിന്റെ അടിസ്ഥാനത്തിൽ പ്രത്യേക പൊലീസ് സംഘം ഈ പ്രദേശത്ത് കെണിയൊരുക്കി നിരീക്ഷണം ശക്തമാക്കി. തുടർന്ന് മറ്റൊരു യുവാവിനൊപ്പം മോട്ടോർ സൈക്കിളിൽ എത്തിയ അസദിനെ പൊലീസ് തടയാൻ ശ്രമിച്ചു.
പൊലീസിനെ കണ്ടയുടൻ അസദ് കയ്യിലുണ്ടായിരുന്ന നാടൻ തോക്ക് ഉപയോഗിച്ച് സംഘത്തിന് നേരെ വെടിയുതിർക്കുകയായിരുന്നു. ഇതേത്തുടർന്ന് സ്വയംരക്ഷാർത്ഥം പൊലീസ് തിരിച്ചടിച്ചു. ഏറ്റുമുട്ടലിൽ ഗുരുതരമായി പരിക്കേറ്റ അസദിനെ ഉടൻ തന്നെ സമീപത്തെ ആശുപത്രിയിൽ എത്തിച്ചെങ്കിലും ചികിത്സയിലിരിക്കെ മരണത്തിന് കീഴടങ്ങുകയായിരുന്നുവെന്ന് ഡെപ്യൂട്ടി പൊലീസ് കമ്മീഷണർ ധവൾ ജയ്സ്വാൾ അറിയിച്ചു. ഏറ്റുമുട്ടലിൽ ഒരു പൊലീസ് കോൺസ്റ്റബിളിനും വെടിയേറ്റിട്ടുണ്ട്. ഇദ്ദേഹത്തിന്റെ പരിക്കുകൾ ഗുരുതരമല്ലെന്നും നില തൃപ്തികരമാണെന്നും അധികൃതർ വ്യക്തമാക്കി.
സംഭവസ്ഥലത്തുനിന്നും പ്രതികൾ സഞ്ചരിച്ച മോട്ടോർ സൈക്കിളും വെടിവെപ്പിനായി ഉപയോഗിച്ച നാടൻ തോക്കും പൊലീസ് കണ്ടെടുത്തു. എന്നാൽ, അസദിനൊപ്പമുണ്ടായിരുന്ന രണ്ടാമൻ ഇരുട്ടിന്റെ മറവിൽ സ്ഥലത്തുനിന്ന് ഓടി രക്ഷപ്പെട്ടു. ഇയാൾക്കായി പ്രദേശത്ത് പൊലീസ് വ്യാപക തിരച്ചിൽ ആരംഭിച്ചിട്ടുണ്ട്. അസദിന്റെ അറസ്റ്റിലേക്ക് നയിക്കുന്ന വിവരങ്ങൾക്ക് പൊലീസ് നേരത്തെ 50,000 രൂപ പ്രതിഫലം പ്രഖ്യാപിച്ചിരുന്നു. കേസിൽ ഉൾപ്പെട്ട മറ്റ് മൂന്ന് പ്രതികളെ കഴിഞ്ഞ ദിവസം പൊലീസ് അറസ്റ്റ് ചെയ്തിരുന്നു.