ഡോക്ടർ ജോർജ് മാത്യുവിന്റെ ഭാര്യ വൽ‌സ മാത്യു അൽഐനിൽ അന്തരിച്ചു

അൽ ഐൻ: യു.എ.ഇ പൗരത്വം നൽകി ആദരിച്ച മലയാളിയായ അൽഐൻ മെഡിക്കൽ ഡിസ്ട്രിക്റ്റ് ഡയറക്ടർ ഡോ. ജോർജ് മാത്യുവിന്റെ ഭാര്യ വൽ‌സ മാത്യു (79) അൽഐനിൽ നിര്യാതയായി.
കെ.എം. ബഞ്ചമിൻ-തങ്കമ്മ ജോൺ ദമ്പതികളുടെ മകളായി 1945ൽ യമനിലെ ഏദനിലാണ് വൽസ ജനിച്ചത്. 1966ൽ ആയിരുന്നു ഡോ. ജോർജ് മാത്യുവുമായുള്ള വിവാഹം. 1967 ലാണ് അൽ ഐനിൽ എത്തുന്നത്. 2004 ലാണ് ഡോ. ജോർജ് മാത്യൂവിനും കുടുംബത്തിനും യു.എ.ഇ സർക്കാർ പൗരത്വം നൽകിയത്.

അൽഐനിലെ പ്രവാസി ഇന്ത്യൻ സമൂഹത്തിന്റെ ഉന്നമനത്തിനായി ഇടപെടൽ നടത്തിയിരുന്ന വൽസ ഇന്ത്യൻ സോഷ്യൽ സെന്റർ,ഇന്ത്യൻ ലേഡീസ് അസോസിയേഷൻ എന്നീ സംഘടനകളുടെ നേതൃപദവി വഹിക്കുകയും ചെയ്തിരുന്നു. ഭർത്താവ് ഡോ. ജോർജ് മാത്യൂവും മകൾ മറിയം പ്രിയ മാത്യുവും അൽഐനിൽ തന്നെയുണ്ട്. നാളെ (മാർച്ച് 3 തിങ്കളാഴ്ച) ഉച്ചയ്ക്ക് 12ന് അൽഐൻ സെന്റ് ഡയനീഷ്യസ് ഓർത്തഡോക്സിൽ സംസ്കാര ചടങ്ങുകൾ നടക്കും.