അബുദാബി: ഈദ് (പെരുന്നാൾ) ദിനത്തിൽ പിറന്ന ആദ്യ കുഞ്ഞുങ്ങളെ ആഹ്‌ളാദത്തോടെ സ്വാഗതം ചെയ്ത് യു.എ.ഇ. അബുദാബിയിലെ എൻ.എം.സി റോയൽ ആശുപത്രിയിലാണ് ആദ്യത്തെ ഈദ് കുഞ്ഞ് ജനിച്ചത്. വെള്ളിയാഴ്ച പുലർച്ചെ 1:39 ന് സ്വാഭാവിക പ്രസവത്തിലൂടെ ജനിച്ച 3.56 കിലോഗ്രാം ഭാരമുള്ളപെൺകുഞ്ഞിന്റെ മാതാപിതാക്കൾ ജോർദാൻ സ്വദേശികളാണ്. വീട്ടമ്മയായ റെഹാഫ് മുഹമ്മദ് മൻസൂറിന്റെയും കമ്പ്യൂട്ടർ എൻജിനീയറായ ഭർത്താവ് ഇബ്രാഹിം അബ്ദുലിന്റെയും പന്ത്രണ്ടാമത്തെ കുട്ടിയാണ് ബേബി സില.
പുലർച്ചെ 1:54 നാണ് ദുബായിലെ പ്രവാസി ഇന്ത്യൻ മാതാപിതാക്കളായ നികിത പരേഷ് വാദ്കക്കും യോഗേഷിനും 2.9 കിലോഗ്രാം ഭാരമുള്ള ആൺകുഞ്ഞ് ദുബായിലെ പ്രൈം ആശുപത്രിയിൽ പിറന്നത്. മൻസൂർ അലി-ഹനീന സൈതമ്മരകത്ത് ദമ്പതികൾക്ക് പുലർച്ചെ 4:39 നാണ് ദുബായ് അൽ ഖിസൈസ് ആസ്റ്റർ ആശുപത്രിയിൽ ആൺകുഞ്ഞ് പിറന്നത്. തൊട്ടുപിന്നാലെ എത്യോപ്യൻ ദമ്പതികളായ വോങ്‌വോസെൻ ജെറെജെ ഏരിയ -ചീകെഡിസ് ടെസ്ഫേ എന്നിവരുടെ ആദ്യ കൺമണിയും പിറന്നു. ദുബായ് അൽ നഹ്ദ സ്പെഷ്യാലിറ്റി ഹോസ്പിറ്റലിൽ ജനിച്ച ഈ ആൺ കുഞ്ഞിന് 3.680 കിലോഗ്രാം ഭാരമുള്ളത്.