അബുദാബി: വ്യവസായി എം എ യൂസഫലിയുടെ ആതിഥേയത്വം സ്വീകരിച്ച് തമിഴ് സൂപ്പർ സ്റ്റാർ രജനികാന്ത്. രജനിയെ അരികിലിരുത്തി അബുദാബിയിലെ തന്റെ വസതിയിലേക്ക് റോൾസ് റോയ്സ് കാർ ഓടിച്ചു പോകുന്ന യൂസഫലിയുടെ ദൃശ്യം സമൂഹ മാധ്യമങ്ങളിൽ വൈറലായി.
പുതിയ ചിത്രമായ ‘വെട്ടിയ’ൻ്റെ ഷൂട്ടിങ്ങിനു ശേഷം ദുബായിൽ സുഹൃത്തുക്കളെ സന്ദർശിക്കാൻ എത്തിയ രജനിയോടുള്ള ആദരവിന്റെ ഭാഗമായാണ് ലുലു ഗ്രൂപ്പ് മേധാവി അദ്ദേഹത്തെ തന്റെ വസതിയിലേക്ക് ക്ഷണിച്ചത്. അബുദാബി നഗരത്തിലുള്ള ലുലു ഇന്റർനാഷണൽ ആസ്ഥാന മന്ദിരം സന്ദർശിച്ച രജനിയെ യൂസഫലി തന്നെ ഡ്രൈവ് ചെയ്ത കാറിലാണ് വീട്ടിലേക്ക് കൊണ്ടുപോയത്.തുടർന്ന് വീട്ടിനകത്തേക്ക് സ്വീകരിച്ചാനയിക്കുന്നതും ഇരുവരും സംഭാഷണം നടത്തുന്നതും വീഡിയോയിൽ കാണാം ഏറെനേരം ചെലവഴിച്ചാണ് രജനികാന്ത് അവിടെ നിന്നും മടങ്ങിയത്.
കഴിഞ്ഞ ദിവസം യു എ ഇയിലെത്തിയ അദ്ദേഹം യു എ ഇയുടെ ഗോൾഡൻ വിസക്കായുള്ള അപേക്ഷ സമർപ്പിച്ചു.നഗരത്തിലെ ക്യാപ്പിറ്റൽ ഹെൽത്ത് സ്ക്രീനിംഗ് കേന്ദ്രത്തിൽ അദ്ദേഹം വിസ അപേക്ഷക്കുവേണ്ടി ആരോഗ്യ പരിശോധന നടത്തി.
ബിസിനസ് ,ആരോഗ്യം കലാ-സാഹിത്യ രംഗങ്ങളിലെ പ്രതിഭകൾക്ക് ആദരവായി നൽകുന്നതാണ് ഗോൾഡൻ വിസ .നേരത്തെ മമ്മൂട്ടി, മോഹൻലാൽ എന്നിവരടക്കം പ്രമുഖ നടന്മാർക്കെല്ലാം ഗോൾഡൻ വിസ ലഭിച്ചതും അബുദാബിയിൽ നിന്നുതന്നെ. ഇതിനകം മലയാളത്തിലെ പ്രമുഖ അഭിനേതാക്കളും ഗായകരുമെല്ലാം തന്നെ ഗോൾഡൻ വിസ സ്വന്തമാക്കിയിട്ടുണ്ട് .