ദുബൈ – യു.എ.ഇയുടെ 54ാമത് ദേശീയ ദിനാഘോഷത്തിന്‍റെ ഭാഗമായി‘ഓർമ’ സംഘടിപ്പിക്കുന്ന കേരളോത്സവം ഡിസംബർ 1,2 തീയതികളിലായി ദുബൈ അമിറ്റി സ്കൂൾ ഗ്രൗണ്ടിൽ നടക്കും. ഒന്നാം തീയതി വൈകീട്ട് നാലു മണി മുതൽ പരിപാടികൾ അരങ്ങേറും. വൈകീട്ട് 6.30ന് നടക്കുന്ന സാംസ്കാരിക സമ്മേളനം മുഖ്യമന്ത്രി പിണറായി വിജയൻ ഉദ്ഘാടനം ചെയ്യും.
ദുബൈ ഇന്ത്യൻ കോൺസുലേറ്റ് പ്രതിനിധികൾ, ബിസിനസ്‌ പ്രമുഖർ സാമൂഹിക സാംസ്കാരിക രംഗത്തെ പ്രതിനിധികൾ, ദുബൈ സർക്കാർ പ്രതിനിധികൾ തുടങ്ങിയവർ പങ്കെടുക്കും. ഓർമ വാദ്യസംഘം അവതരിപ്പിക്കുന്ന മേളവും 500ഓളം വനിതകൾ അണിനിരക്കുന്ന മെഗാ തിരുവാതിരയും മസാല കോഫി ബാൻഡിന്‍റെ സംഗീത പരിപാടിയുമാണ് ആദ്യ ദിവസം. പിന്നണി ഗായകരായ വിധു പ്രതാപും രമ്യ നമ്പീശനും പങ്കെടുക്കുന്ന സംഗീത നിശ, രാജേഷ് ചേർത്തലയുടെ വാദ്യ മേള ഫ്യൂഷൻ എന്നിവയാണ് രണ്ടാം ദിവസത്തെ പ്രധാന പരിപാടികൾ.പ്രവേശനം സൗജന്യമാണ് കുടമാറ്റവും ആനച്ചമയം, സാംസ്കാരിക ഘോഷയാത്ര, പൂക്കാവടികൾ,തെയ്യം, കാവടിയാട്ടം, നാടൻപാട്ട് തുടങ്ങിയ കലാരൂപങ്ങളും അരങ്ങേറും.
പുസ്തകശാല, കവിയരങ്ങ്, പ്രശ്നോത്തരികൾ, പ്രമുഖ ചിത്രകാരൻമാരുടെ തത്സമയ പെയിന്‍റിങ്, ചരിത്ര പുരാവസ്തു പ്രദർശനങ്ങളും നോർക്ക, പ്രവാസി ക്ഷേമനിധി, നോർക്ക കെയർ ഇൻഷുറൻസ്‌ , കെ.എസ്.എഫ്.ഇ തുടങ്ങിയവയുടെ സ്റ്റാളുകളും ഉത്സവപ്പറമ്പിൽ ഒരുക്കുമെന്ന് സംഘാടകർ വാർത്താ സമ്മേളനത്തിൽ അറിയിച്ചു. വാർത്താ സമ്മേളനത്തിൽ പ്രവാസി ക്ഷേമനിധി ഡയറക്ടർ ബോർഡ് മെംബർ എൻ.കെ. കുഞ്ഞഹമ്മദ്, ഓർമ ജനറൽ സെക്രട്ടറി ഷിജു ബഷീർ, പ്രസിഡന്‍റ് ഡോ. നൗഫൽപട്ടാമ്പി, കേരളോത്സവം ജനറൽ കൺവീനർ അനീഷ് മണ്ണാർക്കാട്,ഓർമ വൈസ് പ്രസിഡന്‍റ് ജിജിത അനിൽകുമാർ, കേരളോത്സവം വൈസ് ചെയർമാൻ സി.കെ. റിയാസ്, ഓർമ സെക്രട്ടറി അംബുജാക്ഷൻ,ഒ ഗോൾഡ് ചീഫ് ഇൻവെസ്റ്റ്മെന്‍റ് ഓഫിസർ ഡോ. ഫഹ്മി ഇസ്കന്ദർ, ബോട്ടിങ് റെമിറ്റൻസ് മാനേജർ ഖൈസ് ബദറുദ്ദീൻ തുടങ്ങിയവർ പങ്കെടുത്തു.