കുവൈത്ത് സിറ്റി– കുവൈത്തില്‍ അനധികൃതമായി ഭക്ഷ്യോല്‍പന്നങ്ങള്‍ ഉണ്ടാക്കി വിറ്റ ഇന്ത്യക്കാരന്‍ ഉള്‍പ്പെടെ രണ്ട് പ്രവാസികള്‍ അറസ്റ്റില്‍. മിഷറഫിലെ വാടക വീട്ടില്‍ വെച്ചാണ് അനധികൃതമായി ഭക്ഷ്യോല്‍പന്നങ്ങള്‍ ഉണ്ടാക്കി വിറ്റത്. ആഭ്യന്തര മന്ത്രാലയവും പബ്ലിക് അതോറിറ്റി ഫോര്‍ ഫുഡ് ആന്‍ഡ് ന്യൂട്രീഷനും നടത്തിയ പരിശോധനയിലാണ് പ്രതികളെ പിടികൂടിയത്. അധികൃതർ അനധികൃത കേന്ദ്രം അടച്ചുപൂട്ടുകയും ഉൽപന്നങ്ങൾ പിടിച്ചെടുക്കുകയും ചെയ്തു.
ലൈസന്‍സില്ലാതെയാണ് കേന്ദ്രം നടത്തുന്നതെന്നും അതികൃതര്‍ കണ്ടെത്തി. ഉല്‍പന്നങ്ങളില്‍ മായം കലര്‍ത്തിയതായും പരിശോധനയില്‍ കണ്ടെത്തിയിട്ടുണ്ട്. പ്രതികൾ ഇറക്കുമതി ഉൽപന്നങ്ങളെന്ന പേരിൽ തെറ്റിദ്ധരിപ്പിച്ചാണ് വിൽപന നടത്തി പോന്നിരുന്നത്. പ്രതികളെ കൂടുതൽ നിയമനടപടികൾക്കായി കോംപീറ്റന്റ് അതോറിറ്റിക്ക് കൈമാറി. ശുചിത്വ നിയമ ലംഘനം, റീഫില്ലിങ് ലൈസൻസില്ലാതെ ഭക്ഷ്യ ഉൽപന്നങ്ങൾ പായ്ക്ക് ചെയ്യൽ, അനധികൃത നിർമാണം, ലൈസൻസില്ലാതെയുള്ള പ്രവർത്തനം തുടങ്ങീ കുറ്റങ്ങളാണ് പ്രതികൾക്ക് മേൽ ചുമത്തിയത്. ഇതുകൂടാതെ, പുറമേ താമസ സ്ഥലം ദുരുപയോഗപ്പെടുത്തി അനധികൃത പ്രവർത്തനം നടത്തിയതിനും കേസെടുത്തിട്ടുണ്ട്.