എ. ആർ. റഹ്‌മാന്റെ മടക്കം എം. എ യൂസഫലിയുടെ സ്വകാര്യ ജെറ്റിൽ
ജിദ്ദ– പ്രമുഖ സംഗീത സംവിധായകനും ഗായകനുമായ എ.ആർ റഹ് മാനും മകൾ റഹീമയും ഉംറയുടെ ഉണ്മയിൽ കരഗതമായ ആത്മീയ നിർവൃതിയിൽ ഇന്ന് ഉച്ചയ്ക്ക് ദുബായിലേക്ക് മടങ്ങി. ലുലു ഗ്രൂപ്പ്‌ ചെയർമാൻ എം.എ യൂസഫലിയുടെ സ്വകാര്യ ജെറ്റിൽ അദ്ദേഹത്തിന്റെ മരുമകൻ ഡോ. വി.പി ഷംസീറിനോടൊപ്പമാണ് എ. ആർ. റഹ്മാൻ ദുബായിലേക്ക് മടങ്ങിയത്. അനുഗൃഹീത റമദാന്റെ അവസാനനാളുകൾ വിശുദ്ധ
ഹറമിൽ ചെലവിടാൻ അഞ്ച് നാൾ മുമ്പെത്തിയ യൂസഫലിയും പത്നിയും മക്കയിലുണ്ട്. ദുബായിൽ നിന്ന് മിനിയാന്ന് എമിറേറ്റ്സ് വിമാനത്തിൽ മദീനയിൽ എത്തി സിയാറത്ത് നിർവഹിച്ച ശേഷമാണ് എ.ആർ. റഹ്മാൻ മക്കയിലെത്തിയത്.
ആടുജീവിതത്തിലെ പെരിയോനെ, റഹ്മാനേ എന്ന ഹിറ്റ് ഗാനം എനിക്ക് ഏറെ സന്തോഷം പകർന്നുവെന്ന് ഉംറയുടെ സാഫല്യവുമായി തിരിച്ചു പോകവെ അദ്ദേഹം ദ മലയാളം ന്യൂസിനോട് പറഞ്ഞു.
ഏറെ കാലത്തിനു ശേഷം മലയാള സിനിമയിൽ ചെയ്ത ഈ ഗാനം ഇത്രയും വലിയ ജനപ്രീതി നേടിയതിൽ ഞാൻ ഏറെ സന്തോഷിക്കുന്നു. ആട് ജീവിതത്തെ കുറിച്ചും പുതിയ ഗാനങ്ങളെ കുറിച്ചുമെല്ലാം വിശദമായി നമുക്ക് അടുത്ത തവണ ഇവിടെ വരുമ്പോൾ സംസാരിക്കാം – എ. ആർ. റഹ്മാൻ പറഞ്ഞു. ( photo: എ. ആർ. റഹ്മാൻ മദീന എയർപോർട്ടിൽ)
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group