ജിദ്ദ: യെമനിലെ ഹൂത്തി മിലീഷ്യകളെ ഭീകര സംഘടനാ പട്ടികയില്‍ ഉള്‍പ്പെടുത്തിയതായി അമേരിക്ക അറിയിച്ചു. ഹൂത്തികളെ ഭീകര സംഘടനാ പട്ടികയില്‍ ഉള്‍പ്പെടുത്താന്‍ പ്രസിഡന്റ് ഡൊണാള്‍ഡ് ട്രംപ് തീരുമാനിക്കുകയായിരുന്നെന്ന് വൈറ്റ് ഹൗസ് പ്രസ്താവനയില്‍ പറഞ്ഞു. ഹൂത്തികളുടെ ശേഷികളും പ്രവര്‍ത്തനങ്ങളും ഇല്ലാതാക്കാന്‍ പ്രാദേശിക പങ്കാളികളുമായി സഹകരിക്കുക എന്നതാണ് അമേരിക്കയുടെ നയം. ഹൂത്തികള്‍ക്ക് പണം നല്‍കിയ സ്ഥാപനങ്ങളുമായുള്ള ബന്ധം അവസാനിപ്പിക്കാന്‍ യുനൈറ്റഡ് സ്റ്റേറ്റ്സ് ഏജന്‍സി ഫോര്‍ ഇന്റര്‍നാഷണല്‍ ഡെവലപ്മെന്റിനോട് നിര്‍ദേശിക്കുമെന്നും വൈറ്റ് ഹൗസ് പറഞ്ഞു.
ഹൂത്തികളുടെ പ്രവര്‍ത്തനങ്ങള്‍ മിഡില്‍ ഈസ്റ്റിലെ അമേരിക്കന്‍ സിവിലിയന്മാരുടെയും ഉദ്യോഗസ്ഥരുടെയും സുരക്ഷക്കും . മേഖലയിലെ അമേരിക്കയുടെ ഏറ്റവും അടുത്ത പങ്കാളികളുടെ സുരക്ഷക്കും ആഗോള സമുദ്ര വാണിജ്യത്തിന്റെ സ്ഥിരതക്കും ഭീഷണിയാണ്. ഹൂത്തികളുടെ ശേഷികളും പ്രവര്‍ത്തനങ്ങളും ഇല്ലാതാക്കാനും അവര്‍ക്ക് വിഭവങ്ങള്‍ നിഷേധിക്കാനും അതുവഴി യു.എസ് ഉദ്യോഗസ്ഥര്‍, സിവിലിയന്മാര്‍, യുഎസ് പങ്കാളികള്‍, ചെങ്കടലിലെ കപ്പല്‍ ഗതാഗതം എന്നിവക്കെതിരായ അവരുടെ ആക്രമണങ്ങള്‍ അവസാനിപ്പിക്കുക എന്നതാണ് അമേരിക്കയുടെ നയമെന്നും വൈറ്റ് ഹൗസ് പറഞ്ഞു.
ഇറാന്‍ പിന്തുണയുള്ള ഹൂത്തികള്‍ക്കെതിരെ മുന്‍ പ്രസിഡന്റ് ജോ ബൈഡന്റെ ഭരണകൂടം ഏര്‍പ്പെടുത്തിയതിനേക്കാള്‍ കടുത്ത ഉപരോധങ്ങളാണ് ട്രംപിന്റെ പുതിയ തീരുമാനത്തിലൂടെ ഏര്‍പ്പെടുത്തുന്നത്. ചെങ്കടലില്‍ വാണിജ്യ കപ്പലുകള്‍ക്കും പ്രധാനപ്പെട്ട ഈ ജലപാതയെ സംരക്ഷിക്കുന്നതില്‍ ഏര്‍പ്പെട്ടിരിക്കുന്ന അമേരിക്കന്‍ യുദ്ധക്കപ്പലുകള്‍ക്കും നേരെ ഹൂത്തികള്‍ നടത്തുന്ന ആക്രമണങ്ങള്‍ക്കുള്ള തിരിച്ചടിയെന്നോണമാണ് ഹൂത്തികളെ ഭീകര സംഘടനയില്‍ ഉള്‍പ്പെടുത്തിയത്. അമേരിക്കന്‍ പ്രസിഡന്റ് ആയി ആദ്യമായി സ്ഥാനമേറ്റെടുത്ത ശേഷം ഹൂത്തികളെ ട്രംപ് ഭീകര സംഘടന പട്ടികയില്‍ ഉള്‍പ്പെടുത്തിയിരുന്നു. എന്നാല്‍ 2021 ല്‍ ട്രംപിന്റെ പിന്‍ഗാമിയായി അധികാരമേറ്റ ബൈഡന്‍ ഈ വര്‍ഗീകരണം റദ്ദാക്കുകയായിരുന്നു. പിന്നീട് അവരെ പ്രത്യേകം തരംതിരിച്ച ആഗോള ഭീകരര്‍ എന്ന് ബൈഡന്‍ പ്രഖ്യാപിച്ചു. ഇത് ബൈഡന്‍ കാലത്ത് യെമനില്‍ മാനുഷിക സഹായങ്ങള്‍ എത്താന്‍ അനുവദിച്ചു.
അതേസമയം, ഗാസ യുദ്ധത്തിന്റെ ഫലമായി സൂയസ് കനാല്‍ വരുമാനത്തില്‍ ഈജിപ്തിന് 700 കോടി ഡോളര്‍ നഷ്ടപ്പെട്ടതായി ഈജിപ്ഷ്യന്‍ പ്രസിഡന്റ് അബ്ദുല്‍ഫത്താഹ് അല്‍സീസി പറഞ്ഞു. ഗാസയില്‍ ഫലസ്തീനികള്‍ക്കുള്ള പിന്തുണയെന്നോണം ഇസ്രായിലുമായും പശ്ചാത്യ രാജ്യങ്ങളുമായും ബന്ധമുള്ള ചരക്ക് കപ്പലുകള്‍ക്കും യുദ്ധക്കപ്പലുകള്‍ക്കും നേരെ ചെങ്കടലില്‍ ഹൂത്തികള്‍ നിരന്തം ആക്രമണങ്ങള്‍ നടത്തിയത് ചെങ്കടല്‍ ഒഴിവാക്കി ആഫ്രിക്കയിലെ ഗുഡ്ഹോപ്പ് മുനമ്പ് വലയം ചെയ്തുള്ള സുദീര്‍ഘമായ ബദല്‍ പാത സ്വീകരിക്കാന്‍ നിരവധി ഷിപ്പിംഗ് കമ്പനികളെ പ്രേരിപ്പിച്ചിരുന്നു. ഇത് ചെങ്കടലിനെയും മധ്യധരണ്യഴിയെയും ബന്ധിപ്പിക്കുന്ന സൂയസ് കനാലില്‍ കപ്പല്‍ ഗതാഗതം ഗണ്യമായി കുറയാന്‍ ഇടയാക്കുകയായിരുന്നു.