ജിദ്ദ – സൗദി അറേബ്യയിലെ സ്വദേശികൾക്കിടയിലെ തൊഴിലില്ലായ്മ നിരക്കിൽ നേരിയ വർദ്ധനവ് രേഖപ്പെടുത്തിയതായി ജനറല് അതോറിറ്റി ഫോര് സ്റ്റാറ്റിസ്റ്റിക്സ് പുറത്തുവിട്ട ഏറ്റവും പുതിയ കണക്കുകൾ വ്യക്തമാക്കുന്നു. ഈ വർഷം മൂന്നാം പാദത്തിലെ റിപ്പോർട്ടുകൾ പ്രകാരം സ്വദേശികൾക്കിടയിലെ തൊഴിലില്ലായ്മ നിരക്ക് 7.5 ശതമാനമായാണ് ഉയർന്നത്. രണ്ടാം പാദത്തിൽ ഇത് 6.8 ശതമാനമായിരുന്നു എന്നയിടത്താണ് പുതിയ വർദ്ധനവ് ശ്രദ്ധേയമാകുന്നത്. പുതിയ കണക്കുകൾ വിശകലനം ചെയ്യുമ്പോൾ സ്വദേശികളായ പുരുഷന്മാർക്കിടയിൽ അഞ്ച് ശതമാനവും വനിതകൾക്കിടയിൽ 12.1 ശതമാനവുമാണ് നിലവിലെ തൊഴിലില്ലായ്മ നിരക്ക്. എന്നാൽ കഴിഞ്ഞ വർഷം മൂന്നാം പാദവുമായി താരതമ്യം ചെയ്യുമ്പോൾ ഈ വർഷം ഇതേ കാലയളവിൽ സ്വദേശികൾക്കിടയിലെ തൊഴിലില്ലായ്മയിൽ 0.3 ശതമാനത്തിന്റെ കുറവ് രേഖപ്പെടുത്തിയിട്ടുണ്ട് എന്നത് ആശ്വാസകരമാണ്.
സ്വദേശികളും വിദേശികളും ഉൾപ്പെടെയുള്ള രാജ്യത്തെ ആകെ ജനസംഖ്യയിലെ കണക്കുകൾ പരിശോധിക്കുമ്പോഴും തൊഴിലില്ലായ്മ നിരക്കിൽ വർദ്ധനവ് ദൃശ്യമാണ്. രണ്ടാം പാദത്തിൽ 3.2 ശതമാനമായിരുന്ന ആകെ തൊഴിലില്ലായ്മ നിരക്ക് മൂന്നാം പാദത്തിൽ 3.4 ശതമാനമായാണ് ഉയർന്നത്. ആകെ ജനസംഖ്യയിൽ പുരുഷന്മാർക്കിടയിൽ 2.2 ശതമാനവും വനിതകൾക്കിടയിൽ 9.4 ശതമാനവുമാണ് പുതിയ നിരക്കുകൾ. ഇവിടെയും കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 0.3 ശതമാനത്തിന്റെ കുറവ് മൊത്തം കണക്കുകളിൽ പ്രകടമാണ്. രാജ്യത്തെ തൊഴിൽ വിപണിയിലെ മാറ്റങ്ങളും സ്വദേശിവൽക്കരണ നടപടികളും തുടരുന്നതിനിടയിലാണ് പുതിയ സ്ഥിതിവിവരക്കണക്കുകൾ പുറത്തുവന്നിരിക്കുന്നത്.