റിയാദ്– എത്യോപ്യക്കാരായ 47 നുഴഞ്ഞുകയറ്റക്കാര്ക്ക് യാത്രാ സൗകര്യവും അഭയവും നല്കിയ സൗദി പൗരനെ റിയാദ് പോലീസ് അറസ്റ്റ് ചെയ്തു. നിയമാനുസൃത നടപടികള് സ്വീകരിക്കാന് നുഴഞ്ഞുകയറ്റക്കാരെ ബന്ധപ്പെട്ട വകുപ്പിന് കൈമാറി. ഇവര്ക്ക് യാത്രാ സൗകര്യവും അഭയവും നല്കിയ സൗദി പൗരനെ വിചാരണ ചെയ്ത് ശിക്ഷിക്കുന്നതിന് മുന്നോടിയായി പബ്ലിക് പ്രോസിക്യൂഷന് റഫര് ചെയ്തതായും റിയാദ് പോലീസ് അറിയിച്ചു.
സൗദിയില് നുഴഞ്ഞുകയറാന് നിയമ ലംഘകരെ സഹായിക്കുന്നവര്ക്കും നുഴഞ്ഞുകയറ്റക്കാര്ക്ക് യാത്രാ, താമസ സൗകര്യങ്ങളും ജോലിയും നല്കുന്നവര്ക്കും 15 വര്ഷം വരെ തടവും പത്തു ലക്ഷം റിയാല് വരെ പിഴയും ശിക്ഷ ലഭിക്കും. നുഴഞ്ഞുകയറ്റക്കാര്ക്ക് യാത്രാ സൗകര്യം നല്കാന് ഉപയോഗിക്കുന്ന വാഹനങ്ങളും താമസ സൗകര്യം നല്കാന് ഉപയോഗിക്കുന്ന പാര്പ്പിടങ്ങളും കോടതി വിധിയുടെ അടിസ്ഥാനത്തില് കണ്ടുകെട്ടുകയും ചെയ്യും. ഇഖാമ, തൊഴില് നിയമ ലംഘകരെയും നുഴഞ്ഞുകയറ്റക്കാരെയും ഇത്തരക്കാര്ക്ക് സഹായ സൗകര്യങ്ങള് ചെയ്തുകൊടുക്കുന്നവരെയും കുറിച്ച് മക്ക, മദീന, റിയാദ്, കിഴക്കന് പ്രവിശ്യകളില് 911 എന്ന നമ്പറില് ബന്ധപ്പെട്ടും മറ്റു പ്രവിശ്യകളില് 999, 996 എന്നീ നമ്പറുകളില് ബന്ധപ്പെട്ടും എല്ലാവരും അറിയിക്കണമെന്ന് പൊതുസുരക്ഷാ വകുപ്പ് ആവശ്യപ്പെട്ടു.