റിയാദ് – ഇന്ത്യന്‍ എംബസിയില്‍ ‘ഗീത മഹോത്സവ് എ മ്യൂസിക്കല്‍’ സംഗീത നാടകം അരങ്ങേറി. ‘പ്രവാസി പരിചയ് മേള’യുടെ സമാപനത്തിന്റെ ഭാഗമായി സംഘടിപ്പിച്ച സംഗീത നാടകം ഇന്ത്യന്‍ വിദേശകാര്യ സഹമന്ത്രി കീര്‍ത്തി വര്‍ധന്‍ സിങ്ങിന്റെ അഭിനന്ദന വിഡിയോ സന്ദേശത്തോടെയാണ് ആരംഭിച്ചത്. റിയാദിലെ വൈദേഹി നൃത്ത വിദ്യാലയത്തിലെ വിദ്യാര്‍ഥിനികളാണ് സംഗീത ശില്‍പം അവതരിപ്പിച്ചത്. ഭഗവദ്ഗീതയുടെ സന്ദേശത്തെ സംഗീതത്തിന്റെയും നടനത്തിന്റെയും സാര്‍വത്രിക ഭാഷയിലൂടെ അവര്‍ ജീവസുറ്റതാക്കി.
ഇന്ത്യന്‍ പ്രവാസികളെ മാതൃരാജ്യത്തിന്റെ നാഗരിക പൈതൃകവുമായി ബന്ധിപ്പിക്കുന്ന ആഴത്തിലുള്ള സാംസ്‌കാരികവും ആത്മീയവുമായ ബന്ധങ്ങള്‍ ഉയര്‍ത്തിക്കാട്ടുന്നതിനും ഗീത ഉള്‍ക്കൊള്ളുന്ന ഐക്യം, കടമ, നിസ്വാര്‍ഥ പ്രവര്‍ത്തനം എന്നിവയുടെ സന്ദേശത്തെക്കുറിച്ചുള്ള ചിന്തയ്ക്ക് പ്രചോദനം നല്‍കുന്നതിനുമാണ് എംബസി ഗീതാ മഹോത്സവം സംഘടിപ്പിക്കുന്നതെന്ന് ചടങ്ങില്‍ സംസാരിച്ച ഇന്ത്യന്‍ അംബാസഡര്‍ ഡോ. സുഹൈല്‍ അജാസ് ഖാന്‍ പറഞ്ഞു. റിയാദിലെ ആഘോഷം ഈ മാസം അവസാനം ഹരിയാനയിലെ കുരുക്ഷേത്രയില്‍ നടക്കുന്ന ‘അന്താരാഷ്ട്ര ഗീതാ മഹോത്സവ’ത്തിന്റെ ചൈതന്യം തുടിക്കുന്നതാണെന്നും അദ്ദേഹം പറഞ്ഞു. പത്മശ്രീ, സംഗീത നാടക അക്കാദമി അവാര്‍ഡ് ജേതാവ് പ്രതിഭ പ്രഹ്ലാദ് പരിപാടിയില്‍ പങ്കെടുത്തു.