റിയാദ് – മലസ് ജരീറിലെ റൂമില്‍ കുഴഞ്ഞുവീണ് ആശുപത്രിയിലേക്കുള്ള വഴി മധ്യേ മരിച്ച മലപ്പുറം സ്വദേശിയുടെ മൃതദേഹം റിയാദില്‍ ഖബറടക്കി. ചെമ്മേരിപാറ സ്വദേശി പരേതനായ അവറ കുന്നേടത്തിന്റെയും ബിരിയകുട്ടിയുടെയും മകനായ സിദ്ദിഖ് (57) ആണ് മരിച്ചത്.
കഴിഞ്ഞ 30 വര്‍ഷമായി ജരീറിലെ ബൂഫിയയില്‍ ജോലി ചെയ്തു വരികയായിരുന്നു. ജോലിക്ക് ഹജരാകേണ്ട സമയം കഴിഞ്ഞും സിദ്ദിഖിനെ കാണാതായതിനെ തുടര്‍ന്ന് സുഹൃത്ത് ചേമ്പില്‍ ആസാദ് റൂമില്‍ അന്വേഷിച്ചെത്തിയപ്പോള്‍ അവശനായി തറയില്‍ കിടക്കുന്നതാണ് കണ്ടത്. ഉടന്‍ റെഡ് ക്രസന്റിനെ വിവരമറിയിക്കുകയും ആംബുലന്‍സ് എത്തി പ്രാഥമിക ശുശ്രൂഷ നല്‍കി നാഷണല്‍ കയര്‍ ആശുപത്രിയിലേക്ക് കൊണ്ടുപോവുകയും ചെയ്തു. ആശുപത്രിയിലെത്തും മുമ്പേ മരണപ്പെടുകയായിരുന്നു.
കേളി മലസ് ഏരിയ ജീവകാരുണ്യ കണ്‍വീനര്‍ റഫീഖ് പി എന്‍ എം, ഏരിയ പ്രസിഡണ്ട് മുകുന്ദന്‍ എന്നിവരുടെ നേതൃത്വത്തില്‍ തുടര്‍നടപടികള്‍ പൂര്‍ത്തിയാക്കിയാണ് മൃതദേഹം റിയാദിലെ നസീം മഖ്ബറയില്‍ കബറടക്കിയത്. ഭാര്യ റംല. മക്കള്‍ മുഹമ്മദ് ഷമീര്‍, മുഹമ്മദ് ശമ്മാസ്, സബാന അഫ്‌സത്ത് എന്നിവരാണ്.