റിയാദ് – ബിനാമി ബിസിനസ്, പണം വെളുപ്പിക്കല് കേസില് നാലു പേരെ സുരക്ഷാ വകുപ്പുകള് അറസ്റ്റ് ചെയ്തു. വിദേശിയും വനിത അടക്കം മൂന്നു സൗദി പൗരന്മാരുമാണ് അറസ്റ്റിലായത്. സൗദി വനിത സ്വന്തം പേരില് വ്യാപാര സ്ഥാപനം തുറക്കുകയും സ്ഥാപന നടത്തിപ്പ് ചുമതല ഭര്ത്താവിനെ ഏല്പിക്കുകയും സ്ഥാപന നടത്തിപ്പും സ്ഥാപനത്തിന്റെ അക്കൗണ്ടുകള് കൈകാര്യം ചെയ്യുന്നതിന്റെ ചുമതലയും സൗദി വനിതയുടെ ഭര്ത്താവ് പിന്നീട് വിദേശിയെ ഏല്പിക്കുകയുമായിരുന്നു.
മറ്റൊരു സൗദി പൗരനും സമാന രീതിയില് വ്യാപാര സ്ഥാപനം തുറന്ന് സ്ഥാപന നടത്തിപ്പ് ചുമതല വിദേശിയെ ഏല്പിച്ചു. ഇതിലൂടെ സ്ഥാപനങ്ങളുടെ അക്കൗണ്ടുകള് ദുരുപയോഗിച്ച വിദേശി 20 കോടിയിലേറെ റിയാല് അക്കൗണ്ടുകളില് ഡെപ്പോസിറ്റ് ചെയ്ത് പിന്നീട് വിദേശത്തേക്ക് ട്രാന്സ്ഫര് ചെയ്യുകയായിരുന്നു. രാജ്യത്തെ നിയമങ്ങള് ലംഘിച്ചതിലൂടെയാണ് ഭീമമായ തുക വിദേശി വിദേശങ്ങളിലേക്ക് അയച്ചതെന്ന് അന്വേഷണങ്ങളില് വ്യക്തമായി.
വിദേശങ്ങളിലേക്ക് പണം ട്രാന്സ്ഫര് ചെയ്തതിന്റെ നൂറു കണക്കിന് രേഖകള് വിദേശിയുടെ പക്കല് കണ്ടെത്തി. വിദേശ രാജ്യത്തു നിന്ന് ചരക്കുകള് വാങ്ങാനെന്ന വ്യാജേനെയാണ് ഈ പണം വിദേശത്തേക്ക് അയച്ചത്. ഇതുപ്രകാരമുള്ള ചരക്കുകള് സൗദിയിലേക്ക് ഇറക്കുമതി ചെയ്തിരുന്നില്ല. എന്നാല് ചരക്കുകള് ഇറക്കുമതി ചെയ്തതും അവ സൗദിയില് സ്വീകരിച്ചതും വ്യക്തമാക്കുന്ന വ്യാജ രേഖകള് വിദേശിയുടെ പക്കല് കണ്ടെത്തി. കേസില് അന്വേഷണം പൂര്ത്തിയാക്കിയ പബ്ലിക് പ്രോസിക്യൂഷന് പ്രതികള്ക്കെതിരായ കേസ് പ്രത്യേക കോടതിക്ക് കൈമാറിയിട്ടുണ്ട്.