മക്ക– മക്ക മുഴുവന് പുണ്യസ്ഥലം (ഹറം) ആണെന്ന് ഹജ്, ഉംറ മന്ത്രാലയം. മക്കയില് ഹറം പരിധിയിലെ മസ്ജിദുകളിലും ഹറമിന് ചുറ്റുമുള്ള ഹോട്ടലുകളിലെ നമസ്കാര സ്ഥലങ്ങളിലും തീര്ഥാടകര്ക്ക് നമസ്കരിക്കാമെന്ന് എക്സ് പ്ലാറ്റ്ഫോമിലൂടെ മന്ത്രാലയം കൂട്ടിച്ചേര്ത്തു. ഹറം പരിധിക്കുള്ളിലെ മസ്ജിദുകളില് നിര്വഹിക്കുന്ന നമസ്കാരത്തിന് വിശുദ്ധ ഹറമില് നിര്വഹിക്കുന്ന നമസ്കാരത്തിന്റെ തുല്യമായ പ്രതിഫലം ലഭിക്കുമെന്ന്, പുണ്യറമദാനില് വിശുദ്ധ ഹറമിലെ തിരക്ക് കുറക്കാന് ശ്രമിച്ചുള്ള ബോധവല്ക്കരണത്തിന്റെ ഭാഗമായി ഹജ്, ഉംറ മന്ത്രാലയം വ്യക്തമാക്കി.
ഇത്തവണത്തെ റമദാനില് ഏറ്റവും കൂടുതല് പേര് ഉംറ കര്മം നിര്വഹിച്ചത് റമദാന് നാലിനായിരുന്നു. അന്ന് 9,04,000 തീര്ഥാടകര് ഉംറ നിര്വഹിച്ചതായി ഹറംകാര്യ വകുപ്പ് അറിയിച്ചു. വിശുദ്ധ ഹറമിന്റെ ശുചിത്വം നിലനിര്ത്തുന്നതിന്, ഉംറ കര്മം പൂര്ത്തിയാക്കിയ ശേഷം തലമുടി വെട്ടാന് മര്വ ഗേറ്റിന് സമീപം ലഭ്യമായ സൗജന്യ സേവനം പ്രയോജനപ്പെടുത്തുകയോ ബാര്ബര്ഷോപ്പുകളെ സമീപിക്കുകയോ ചെയ്യണമെന്ന് ഹറംമതകാര്യ വകുപ്പ് തീര്ഥാടകരോട് അഭ്യര്ഥിച്ചു. തിരക്ക് കണക്കിലെടുത്ത് റമദാനില് മര്വ ഗേറ്റിനു സമീപം സൗജന്യ മുടിവെട്ട് സേവനം നല്കുന്ന മൊബൈല് യൂണിറ്റുകളുടെ എണ്ണം ഹറംകാര്യ വകുപ്പ് വര്ധിപ്പിച്ചിട്ടുണ്ട്.
വിശുദ്ധ ഹറമില് ഉറങ്ങുന്നത് ഒഴിവാക്കണമെന്ന് ഹജ്, ഉംറ മന്ത്രാലയം തീര്ഥാടകരോട് അഭ്യര്ഥിച്ചു. ഹറമില് ഉറങ്ങുന്നത് സ്ഥലത്തിന്റെ ശാന്തതയെ തടസ്സപ്പെടുത്തുകയും തീര്ഥാടകരുടെയും വിശ്വാസികളുടെയും നീക്കത്തെ തടസ്സപ്പെടുത്തുകയും ചെയ്യും. ഈ പെരുമാറ്റം വിശ്വാസികളുടെയും ത്വവാഫ് ചെയ്യുന്നവരുടെയും സുഖസൗകര്യങ്ങളെ ബാധിക്കുകയും ആവശ്യമുള്ളപ്പോള് എമര്ജന്സി സംഘങ്ങളുടെ വരവ് വൈകിപ്പിക്കുകയും ചെയ്യും. ക്ഷീണം തോന്നുന്നവര് അവരുടെ താമസസ്ഥലത്തേക്കോ ഹോട്ടലിലേക്കോ മടങ്ങലാണ് ഏറ്റവും നല്ല ഓപ്ഷന് എന്നും ഹജ്, ഉംറ മന്ത്രാലയം പറഞ്ഞു.