റിയാദ് – നാലു പതിറ്റാണ്ടുകള്‍ക്ക് മുമ്പ് തുറന്ന ശേഷം റിയാദ് കിംഗ് ഖാലിദ് അന്താരാഷ്ട്ര വിമാനത്താവളം ഏറ്റവും വലിയ തന്ത്രപരമായ പരിവര്‍ത്തന പദ്ധതി നടപ്പാക്കുന്നു. 2026 ആദ്യ പാദത്തില്‍ ആഭ്യന്തര, അന്തര്‍ദേശീയ വിമാന സര്‍വീസുകള്‍ക്കിടയില്‍ ആദ്യമായി ടെര്‍മിനലുകള്‍ പുനഃക്രമീകരിക്കുമെന്ന് എയര്‍പോര്‍ട്ട് അറിയിച്ചു. യാത്രക്കാർക്ക് സുഖകരമാക്കാനും ടെര്‍മിനലുകള്‍ക്കിടയിലുള്ള ഗതാഗത സമയം കുറക്കാനുമാണ് ഈ നീക്കത്തിലൂടെ ലക്ഷ്യമിടുന്നത്.
പദ്ധതി പ്രകാരം ഒന്നും രണ്ടും ടെര്‍മിനലുകള്‍ പൂര്‍ണമായും സൗദി വിമാനക്കമ്പനികള്‍ നടത്തുന്ന ആഭ്യന്തര വിമാന സര്‍വീസുകള്‍ക്കായി നീക്കിവെക്കും. മൂന്നും നാലും ടെര്‍മിനലുകള്‍ സൗദി വിമാനക്കമ്പനികള്‍ നടത്തുന്ന അന്താരാഷ്ട്ര സര്‍വീസുകള്‍ക്കായും നീക്കിവെക്കും. വിദേശ വിമാനക്കമ്പനികള്‍ നടത്തുന്ന എല്ലാ അന്താരാഷ്ട്ര സര്‍വീസുകള്‍ക്കും ടെര്‍മിനല്‍ 5 ഉപയോഗിക്കും.
സേവനങ്ങളുടെ ഗുണനിലവാരം ഉയര്‍ത്തുന്നതും യാത്രക്കാരുടെ അനുഭവം മെച്ചപ്പെടുത്തുന്നതും ഉള്‍പ്പെടുന്ന വിശാലമായ വികസന സംരംഭങ്ങളുടെ ഭാഗമാണ് പുതിയ ക്രമീകരണമെന്ന് എയര്‍പോര്‍ട്ട് വിശദീകരിച്ചു. യാത്രക്കാരെ ബാധിക്കാതെ പ്രവര്‍ത്തനങ്ങള്‍ തുടരുന്നത് ഉറപ്പാക്കുന്നതിന് 2026 ആദ്യമാസങ്ങളില്‍ ക്രമേണ സ്ഥലംമാറ്റ പ്രക്രിയ നടപ്പാക്കും.
പുനഃക്രമീകരണം വിമാനത്താവളത്തിനുള്ളിലെ നടത്ത ദൂരം കുറക്കാനും പ്രവര്‍ത്തന കാര്യക്ഷമത മെച്ചപ്പെടുത്താനും സഹായിക്കുമെന്ന് എയര്‍പോര്‍ട്ട് അഡ്മിനിസ്‌ട്രേഷന്‍ വ്യക്തമാക്കി. ഇത് യാത്രക്കാരുടെ അനുഭവത്തില്‍ പോസിറ്റീവായ സ്വാധീനം ചെലുത്തുകയും പ്രധാന അന്താരാഷ്ട്ര കേന്ദ്രമെന്ന നിലയില്‍ റിയാദ് വിമാനത്താവളത്തിന്റെ സ്ഥാനം വര്‍ധിപ്പിക്കുകയും ചെയ്യും.