ജിദ്ദ– പെട്രോള് ബങ്കുകള്ക്കും സര്വീസ് സെന്ററുകള്ക്കുമായുള്ള സ്ഥിരം എക്സിക്യൂട്ടീവ് കമ്മിറ്റിക്കു കീഴിലെ പരിശോധനാ സംഘങ്ങള് ചിലയിനം പെട്രോളിയം ഉല്പ്പങ്ങള് വില്ക്കാന് വിസമ്മതിച്ചത് ഉള്പ്പെടെയുള്ള ലംഘനങ്ങള്ക്ക് അഞ്ചു പെട്രോള് ബങ്കുകള് കൂടി അടച്ചുപൂട്ടി. കിഴക്കന് പ്രവിശ്യ, അസീര്, അല്ഹസ നഗരസഭ പരിധികളില് പ്രവര്ത്തിക്കുന്ന പെട്രോള് ബങ്കുകളാണ് ബന്ധപ്പെട്ട വകുപ്പുകളുമായി ഏകോപിപ്പിച്ച് അടച്ചുപൂട്ടിയത്. ഇതോടെ രണ്ടു ദിവസത്തിനിടെ അടപ്പിച്ച പെട്രോള് ബങ്കുകളുടെ എണ്ണം എട്ടായി. ജിദ്ദ, തബൂക്ക്, കിഴക്കന് പ്രവിശ്യ നഗരസഭ പരിധികളില് പ്രവര്ത്തിക്കുന്ന മൂന്നു പെട്രോള് ബങ്കുകള് കഴിഞ്ഞ ദിവസം അടപ്പിച്ചിരുന്നു.
പെട്രോള് ബങ്കുകളും സര്വീസ് സെന്ററുകളും ആവശ്യമായ വ്യവസ്ഥകള് പാലിക്കുന്നുണ്ടെന്ന് ഉറപ്പാക്കാന് എല്ലാ ബന്ധപ്പെട്ട വകുപ്പുകളുമായും സഹകരിച്ച് പരിശോധനാ സംഘങ്ങള് തുടര്ച്ചയായി പരിശോധനകള് നടത്തുന്നുണ്ട്. പെട്രോള് ബങ്കുകളുടെയും സര്വീസ് സെന്ററുകളുടെയും ഭാഗത്തുള്ള നിയമ ലംഘനങ്ങളെ കുറിച്ച് ഏകീകൃത നമ്പറായ 8001244777 ല് ബന്ധപ്പെട്ടോ ആപ്പിള്, ആന്ഡ്രോയ്ഡ് സ്റ്റോറുകളില് ലഭ്യമായ ഖിദ്മതുശ്ശുറകാ ആപ്പ് വഴിയോ എല്ലാവരും അറിയിക്കണമെന്ന് കമ്മിറ്റി ആവശ്യപ്പെട്ടു.