ജിദ്ദ – അഴിമതി കേസുകളില്‍ കുറ്റക്കാരായ വ്യക്തികളുമായും സ്ഥാപനങ്ങളുമായും സാമ്പത്തിക ഒത്തുതീര്‍പ്പുകള്‍ നടത്തി അഴിമതി പണം തിരികെ ഈടാക്കാനുള്ള അടിസ്ഥാന വ്യവസ്ഥകള്‍ തിരുഗേഹങ്ങളുടെ സേവകന്‍ സല്‍മാന്‍ രാജാവ് അംഗീകരിച്ചതായി ഓവര്‍സൈറ്റ് ആന്റ് ആന്റി-കറപ്ഷന്‍ അതോറിറ്റി പ്രസിഡന്റ് മാസിന്‍ അല്‍കഹ്‌മോസ് അറിയിച്ചു.
അപഹരിക്കപ്പെട്ട പണം തിരിച്ചുപിടിക്കാനും സാമ്പത്തിക അഴിമതി കേസുകളില്‍ വേഗത്തില്‍ നീതി ലഭ്യമാക്കാനുമാണ് സാമ്പത്തിക ഒത്തുതീര്‍പ്പ് വ്യവസ്ഥകളിലൂടെ ലക്ഷ്യമിടുന്നത്. അഴിമതി ഇല്ലാതാക്കാനും, അഴിമതി കുറ്റകൃത്യങ്ങളില്‍ നിന്നുള്ള വരുമാനവും അഴിമതികളുടെ ഫലമായ ഫണ്ടുകളും തിരിച്ചുപിടിക്കാനും ആവശ്യമായ എല്ലാ മാര്‍ഗങ്ങളും സംവിധാനങ്ങളും സ്വീകരിക്കുന്നത് രാജ്യം തുടരുകയാണ്.
സമവായ നീതിയുടെ ഒരു രൂപമെന്നോണം സാമ്പത്തിക ഒത്തുതീര്‍പ്പ് വ്യവസ്ഥകള്‍ ബന്ധപ്പെട്ട കക്ഷികള്‍ പ്രയോജനപ്പെടുത്തണം. അഴിമതി കേസ് പ്രതികളുമായി സാമ്പത്തിക ഒത്തുതീര്‍പ്പ് നടത്തുന്നതുമായി ബന്ധപ്പെട്ട വ്യവസ്ഥകള്‍ അടങ്ങിയ രാജകീയ ഉത്തരവ് പുറപ്പെടുവിക്കുന്നതിന് മുമ്പ്, സാമ്പത്തിക അഴിമതി കുറ്റകൃത്യങ്ങളില്‍ ഒത്തുതീര്‍പ്പുകള്‍ക്ക് മുന്നോട്ടുവന്നവര്‍ക്കെതിരെ ക്രിമിനല്‍ നടപടികള്‍ സ്വീകരിക്കില്ലെന്നും മാസിന്‍ അല്‍കഹ്‌മോസ് പറഞ്ഞു.