ജിദ്ദ – സൗദി അറേബ്യന്‍ എയര്‍ലൈന്‍സിനു കീഴിലെ ബജറ്റ് വിമാന കമ്പനിയായ ഫ്‌ളൈ അദീല്‍ ജൂലൈയില്‍ സിറിയയിലേക്ക് വിമാന സര്‍വീസുകള്‍ ആരംഭിച്ചേക്കുമെന്ന് ഫ്‌ളൈ അദീല്‍ സി.ഇ.ഒ സ്റ്റീഫന്‍ ഗ്രീന്‍വേ പറഞ്ഞു. മറ്റൊരു ബജറ്റ് വിമാന കമ്പനിയായ ഫ്‌ളൈ നാസ് സൗദി അറേബ്യക്കും സിറിയക്കും ഇടയില്‍ ഉടന്‍ തന്നെ നേരിട്ടുള്ള വിമാന സര്‍വീസുകള്‍ ആരംഭിക്കുമെന്ന് അല്‍ഇഖ്ബാരിയ ടി.വിയും റിപ്പോര്‍ട്ട് ചെയ്തു. ദമാസ്‌കസിലേക്ക് വിമാന സര്‍വീസുകള്‍ നടത്താന്‍ കഴിഞ്ഞയാഴ്ച ഫ്‌ളൈ അദീലിന് അനുമതി ലഭിച്ചതായി സ്റ്റീഫന്‍ ഗ്രീന്‍വേ പറഞ്ഞു. ഉപരോധങ്ങള്‍ ലഘൂകരിച്ചതിനെ തുടര്‍ന്ന് ഏതാനും വിദേശ വിമാന കമ്പനികള്‍ ദമാസ്‌കസ് സര്‍വീസ് പുനരാരംഭിച്ചിട്ടുണ്ട്. യു.എ.ഇ ആസ്ഥാനമായുള്ള വിമാന കമ്പനിയായ ഫ്‌ളൈ ദുബായ് അടുത്ത ജൂണ്‍ മുതല്‍ ദമാസ്‌കസിലേക്കുള്ള വിമാന സര്‍വീസുകള്‍ പുനരാരംഭിക്കാന്‍ ഉദ്ദേശിക്കുന്നതായി അറിയിച്ചിട്ടുണ്ട്.
സൗദി ജനറല്‍ അതോറിറ്റി ഓഫ് സിവില്‍ ഏവിയേഷനില്‍ നിന്നുള്ള പ്രതിനിധി സംഘം ഏപ്രില്‍ 10 ന് ദമാസ്‌കസ് അന്താരാഷ്ട്ര വിമാനത്താവളം സന്ദര്‍ശിച്ചിരുന്നു. സൗദി ദേശീയ വിമാന കമ്പനികളുടെ വിമാന സര്‍വീസുകള്‍ പുനരാരംഭിക്കാനുള്ള തയാറെടുപ്പിനായി അംഗീകൃത അന്താരാഷ്ട്ര നടപടിക്രമത്തിന്റെ ഭാഗമായാണ് സൗദി സംഘം പതിവ് പരിശോധനാ പര്യടനം നടത്തിയത്.
സിറിയക്കു മേല്‍ ഏര്‍പ്പെടുത്തിയിരിക്കുന്ന ഉപരോധങ്ങള്‍ നീക്കാന്‍ യു.എസ് പ്രസിഡന്റ് ഡൊണാള്‍ഡ് ട്രംപിന്റെ ഭരണകൂടം കഴിഞ്ഞയാഴ്ച ഉത്തരവുകള്‍ പുറപ്പെടുവിച്ചു. സിറിയക്കു മേല്‍ ഏര്‍പ്പെടുത്തിയിരിക്കുന്ന സാമ്പത്തിക ഉപരോധങ്ങള്‍ നീക്കാന്‍ യൂറോപ്യന്‍ യൂനിയന്‍ വിദേശ മന്ത്രിമാരും കഴിഞ്ഞയാഴ്ച ധാരണയിലെത്തി.
14 വര്‍ഷം നീണ്ട ആഭ്യന്തര യുദ്ധത്തിനിടെ നിരവധി വിമാന കമ്പനികള്‍ സിറിയയില്‍ നിന്ന് പിന്‍വാങ്ങി. മുന്‍ പ്രസിഡന്റ് ബശാര്‍ അല്‍അസദിനെ 2024 ഡിസംബറില്‍ സ്ഥാനഭ്രഷ്ടനാക്കിയത് സിറിയയിലേക്കുള്ള അന്താരാഷ്ട്ര വിമാന സര്‍വീസുകള്‍ താല്‍ക്കാലികമായി നിര്‍ത്തിവെക്കാനും ഇടയാക്കി. എന്നാല്‍ വൈകാതെ അന്താരാഷ്ട്ര വിമാന സര്‍വീസുകള്‍ പുനരാരംഭിച്ചു. നിലവില്‍ സിറിയന്‍ വിമാന കമ്പനികള്‍ക്കു പുറമെ ഖത്തര്‍ എയര്‍വെയ്സ്, ടര്‍ക്കിഷ് എയര്‍ലൈന്‍സ്, റോയല്‍ ജോര്‍ദാനിയന്‍ എന്നിവയും സിറിയയിലേക്ക് സര്‍വീസുകള്‍ നടത്തുന്നു.