ബോട്ട് തകരാറിലായി നടുക്കടലിൽ കുടുങ്ങിയ ഇന്ത്യക്കാരനടക്കമുള്ള പത്തംഗ സംഘത്തെ രക്ഷപ്പെടുത്തി

ജിദ്ദ: ബോട്ട് തകരാറിലായി നടുക്കടലിൽ കുടുങ്ങിയ ഒരു ഇന്ത്യക്കാരനും ഒമ്പത് സൗദി പൗരന്മാരും അടങ്ങിയ പത്തംഗ സംഘത്തെ ജിദ്ദയിലെ അതിർത്തി സുരക്ഷാ സേനയുടെ കീഴിലുള്ള തിരച്ചിൽ, രക്ഷാ സംഘങ്ങൾ രക്ഷപ്പെടുത്തി. രക്ഷപ്പെടുത്തിയവർക്ക് ആവശ്യമായ സഹായങ്ങൾ നൽകിയതായും അധികൃതർ അറിയിച്ചു.

കടലിൽ ഇറങ്ങുന്നതിന് മുമ്പ് സമുദ്ര സുരക്ഷാ മാർഗനിർദേശങ്ങൾ കർശനമായി പാലിക്കണമെന്നും ബോട്ടുകളുടെ സുരക്ഷ ഉറപ്പാക്കണമെന്നും അതിർത്തി സുരക്ഷാ സേന ആവശ്യപ്പെട്ടു. അടിയന്തിര സാഹചര്യങ്ങളിൽ മക്ക, മദീന, കിഴക്കൻ പ്രവിശ്യ എന്നിവിടങ്ങളിൽ 911 എന്ന നമ്പറിലും മറ്റ് പ്രവിശ്യകളിൽ 994 എന്ന നമ്പറിലും ബന്ധപ്പെട്ട് സഹായം തേടണമെന്നും അധികൃതർ നിർദേശിച്ചു.