ജിദ്ദ – അഴിമതി കേസുകളില് വിവിധ മന്ത്രാലയങ്ങളിലെയും വകുപ്പുകളിലെയും ഉദ്യോഗസ്ഥര് അടക്കം 113 പേരെ നവംബര് മാസത്തില് അറസ്റ്റ് ചെയ്തതായി ഓവര്സൈറ്റ് ആന്റ് ആന്റി-കറപ്ഷന് അതോറിറ്റി അറിയിച്ചു. കൈക്കൂലി, അധികാര ദുര്വിനിയോഗം എന്നീ കേസുകളില് ആകെ 371 പേരെയാണ് കഴിഞ്ഞ മാസം ചോദ്യം ചെയ്തത്. ഇക്കൂട്ടത്തില് കുറ്റക്കാരാണെന്ന് തെളിഞ്ഞ 113 പേരെ അറസ്റ്റ് ചെയ്തു. ഇതില് ചിലരെ പിന്നീട് ജാമ്യത്തില് വിട്ടയച്ചു.
ആഭ്യന്തര, മുനിസിപ്പല്-പാര്പ്പിടകാര്യ, വിദ്യാഭ്യാസ, ആരോഗ്യ, പ്രതിരോധ മന്ത്രാലയ ഉദ്യോഗസ്ഥര് അറസ്റ്റിലായ കൂട്ടത്തിലുണ്ട്. പ്രതികള്ക്കെതിരായ കേസുകള് കോടതിക്ക് കൈമാറുന്നതിനു മുന്നോടിയായി നിയമാനുസൃത നടപടികള് പൂര്ത്തിയാക്കി വരികയാണ്. അഴിമതിയും അധികാര ദുര്വിനിയോഗവും മറ്റും സംശയിച്ച് നവംബറില് വിവിധ പ്രവിശ്യകളില് 6,981 ഫീല്ഡ് പരിശോധനകളാണ് നടത്തിയതെന്നും ഓവര്സൈറ്റ് ആന്റ് ആന്റി-കറപ്ഷന് അതോറിറ്റി വ്യക്തമാക്കി.