റിയാദ് – കഴിഞ്ഞ വര്‍ഷം ആദ്യ പാദത്തെ അപേക്ഷിച്ച് ഈ കൊല്ലം ആദ്യ പാദത്തില്‍ എണ്ണയിതര കയറ്റുമതിയില്‍ 13.4 ശതമാനം വളര്‍ച്ച രേഖപ്പെടുത്തിയതായി ജനറല്‍ അതോറിറ്റി ഫോര്‍ സ്റ്റാറ്റിസ്റ്റിക്‌സ് അറിയിച്ചു. മാര്‍ച്ച് മാസത്തില്‍ പെട്രോളിതര കയറ്റുമതി 10.7 ശതമാനം തോതില്‍ വര്‍ധിച്ചു. സൗദി അറേബ്യയുടെ വിദേശ വ്യാപാരത്തില്‍ എണ്ണയിതര മേഖലയുടെ സംഭാവന വര്‍ധിക്കുന്നതായി ഈ കണക്കുകള്‍ വ്യക്തമാക്കുന്നു.
ആദ്യ പാദത്തില്‍ ആകെ കയറ്റുമതി 3.2 ശതമാനം തോതില്‍ കുറഞ്ഞു. മാര്‍ച്ചില്‍ കയറ്റുമതി 9.8 ശതമാനം തോതിലും കുറഞ്ഞു. ഇറക്കുമതി ആദ്യ പാദത്തില്‍ 7.3 ശതമാനവും മാര്‍ച്ചില്‍ 0.1 ശതമാനവും തോതില്‍ വര്‍ധിച്ചു. വ്യാപാര മിച്ചം ആദ്യ പാദത്തില്‍ 28 ശതമാനവും മാര്‍ച്ചില്‍ 34.2 ശതമാനവും തോതില്‍ കുറഞ്ഞു.
ആകെ കയറ്റുമതിയില്‍ പെട്രോളിയം ഉല്‍പന്നങ്ങളുടെ വിഹിതം ആദ്യ പാദത്തില്‍ 71.8 ശതമാനമായും മാര്‍ച്ചില്‍ 71.2 ശതമാനമായും കുറഞ്ഞു. 2024 ആദ്യ പാദത്തില്‍ ഇത് 75.9 ശതമാനവും മാര്‍ച്ചില്‍ 76.5 ശതമാനവുമായിരുന്നു. ജനുവരി, ഫെബ്രുവരി, മാര്‍ച്ച് മാസങ്ങളില്‍ ആകെ കയറ്റുമതി 285.8 ബില്യണ്‍ റിയായും ഇറക്കുമതി 222.7 ബില്യണ്‍ റിയാലും ആകെ വിദേശ വ്യാപാരം 508.5 ബില്യണ്‍ റിയാലും വ്യാപാര മിച്ചം 63.1 ബില്യണ്‍ റിയാലുമാണ്. മാര്‍ച്ചില്‍ ആകെ കയറ്റുമതി 93.8 ബില്യണ്‍ റിയാലും ഇറക്കുമതി 74 ബില്യണ്‍ റിയാലും ആകെ വ്യാപാരം 167.8 ബില്യണ്‍ റിയാലും വ്യാപാര മിച്ചം 19.8 ബില്യണ്‍ റിയാലുമാണ്.
സൗദി അറേബ്യയുടെ ഏറ്റവും വലിയ വാണിജ്യ പങ്കാളിയായി ചൈന തുടരുന്നതായി സ്ഥിതിവിവര കണക്കുകള്‍ സൂചിപ്പിക്കുന്നു. ആദ്യ പാദത്തില്‍ ആകെ കയറ്റുമതിയുടെ 15.7 ശതമാനവും ചൈനയിലേക്കായിരുന്നു. സൗദിയിലേക്കുള്ള ഇറക്കുമതിയില്‍ 26.6 ശതമാനവും ചൈനയില്‍ നിന്നായിരുന്നു. മാര്‍ച്ച് മാസത്തില്‍ കയറ്റുമതിയുടെ 15.5 ശതമാനവും ഇറക്കുമതിയുടെ 25.3 ശതമാനവും ചൈനയുമായിട്ടായിരുന്നെന്നും ജനറല്‍ അതോറിറ്റി ഫോര്‍ സ്റ്റാറ്റിസ്റ്റിക്‌സ് അറിയിച്ചു.