ജിദ്ദ – കഴിഞ്ഞ വര്‍ഷം സൗദിയില്‍ കാര്‍ഷിക കയറ്റുമതി 13 ശതമാനം തോതില്‍ വര്‍ധിച്ച് 5,06,000 ടണ്‍ ആയതായി ജനറല്‍ അതോറിറ്റി ഫോര്‍ സ്റ്റാറ്റിസ്റ്റിക്‌സ് അറിയിച്ചു. കാര്‍ഷിക കയറ്റുമതിയുടെ 72.1 ശതമാനം പഴവര്‍ഗങ്ങളാണ്. കഴിഞ്ഞ കൊല്ലം ഈത്തപ്പഴ ഉല്‍പാദനം ഒരു ശതമാനം തോതില്‍ വര്‍ധിച്ച് 19.23 ലക്ഷം ടണ്ണായി. ഈന്തപ്പനകളുടെ എണ്ണം 3.76 കോടി കവിഞ്ഞു. ഇതില്‍ 3.2 കോടിയിലേറെ ഈന്തപ്പനകള്‍ ഫലം കായ്ക്കുന്നവയാണ്.
ഏറ്റവും കൂടുതല്‍ ഈന്തപ്പനകള്‍ ഉള്ളത് അല്‍ഖസീം പ്രവിശ്യയിലാണ്. ഇവിടെ 1.08 കോടി ഈന്തപ്പനകളുണ്ട്. അല്‍ഖസീമില്‍ പ്രതിവര്‍വര്‍ഷം 5,84,000 ടണ്‍ ഈത്തപ്പഴം ഉല്‍പാദിപ്പിക്കുന്നു. ഈന്തപ്പനകളുടെ എണ്ണത്തില്‍ ഒന്നാം സ്ഥാനം ഖലാസ് ഇനമാണ്. ഈയിനത്തില്‍ പെട്ട 1.09 കോടിയിലേറെ ഈന്തപ്പനകള്‍ സൗദിയിലുണ്ട്. ഇതില്‍ 96 ലക്ഷം ഫലം കായ്ക്കുന്നവയാണ്. ഖലാസ് ഇനത്തില്‍ പെട്ട 6,16,000 ടണ്‍ ഈത്തപ്പഴം പ്രതിവര്‍ഷം സൗദിയില്‍ ഉല്‍പാദിപ്പിക്കുന്നു. കഴിഞ്ഞ വര്‍ഷം സൗദിയില്‍ 16 ലക്ഷം ടണ്‍ ധാന്യങ്ങള്‍ ഉല്‍പാദിപ്പിച്ചു. ഇതിന്റെ 71.9 ശതമാനവും ഗോതമ്പ് ആണ്. 2024 ല്‍ സൗദിയില്‍ 11 ലക്ഷം ടണ്‍ ഗോതമ്പ് ഉല്‍പാദിപ്പിച്ചു. 2023 നെ അപേക്ഷിച്ച് 2024 ല്‍ ഗോതമ്പ് ഉല്‍പാദനം 9.7 ശതമാനം തോതില്‍ കുറഞ്ഞു.
ഇതേ കാലയളവില്‍ പച്ചക്കറി കൃഷി ചെയ്യുന്ന തുറസ്സായ സ്ഥലങ്ങളുടെ വിസ്തീര്‍ണത്തില്‍ 8.4 ശതമാനം വര്‍ധനവ് ഉണ്ടായി. കഴിഞ്ഞ വര്‍ഷം 89,700 ഹെക്ടര്‍ തുറസ്സായ സ്ഥലങ്ങളില്‍ പച്ചക്കറി കൃഷി ചെയ്തു. 27.45 ലക്ഷം ടണ്‍ പച്ചക്കറി ഉല്‍പാദിപ്പിച്ചു. പച്ചക്കറി ഉല്‍പാദനത്തില്‍ മുന്നില്‍ ഉരുളക്കിഴങ്ങ് ആണ്. കഴിഞ്ഞ വര്‍ഷം 6.24,000 ടണ്‍ ഉരുളക്കിഴങ്ങ് ഉല്‍പാദിപ്പിച്ചു. രണ്ടാം സ്ഥാനത്ത് തണ്ണിമത്തന്‍ ആണ്. 2024 ല്‍ ഏകദേശം 6,12,000 ടണ്‍ തണ്ണിമത്തന്‍ ഉല്‍പാദിപ്പിച്ചു.
ഹരിതഗൃഹ പച്ചക്കറികളുടെ ഉല്‍പാദനം 7,97,000 ടണ്‍ ആയി ഉയര്‍ന്നു. 2023 നെ അപേക്ഷിച്ച് കഴിഞ്ഞ കൊല്ലം ഹരിതഗൃഹ പച്ചക്കറികളുടെ ഉല്‍പാദനം 10.6 ശതമാനം തോതില്‍ വര്‍ധിച്ചു. ഹരിതഗൃഹ പച്ചക്കറികള്‍ കൃഷി ചെയ്യുന്ന സ്ഥലങ്ങളുടെ വിസ്തീര്‍ണം 7,800 ഹെക്ടറിലെത്തി. പച്ചക്കറി കൃഷിക്ക് ഉപയോഗിക്കുന്ന ഹരിതഗൃഹങ്ങളുടെ എണ്ണം 1,21,000 കവിഞ്ഞു. ഹരിതഗൃഹ പച്ചക്കറി ഉല്‍പാദനത്തില്‍ മുന്നില്‍ തക്കാളിയാണ്, 3,29,000 ടണ്‍ തക്കാളി ഹരിതഗൃഹങ്ങളില്‍ ഉല്‍പാദിപ്പിച്ചു. രണ്ടാം സ്ഥാനത്ത് കക്കരിയാണ്. 2,32,000 ലേറെ ടണ്‍ കക്കരി കഴിഞ്ഞ കൊല്ലം ഉല്‍പാദിപ്പിച്ചു.
2024 ല്‍ രാജ്യത്ത് സ്ഥിരം മരങ്ങളുടെ എണ്ണം ഏകദേശം 4.3 കോടിയിലെത്തി. ഇതില്‍ 81.9 ശതമാനവും ഫലവൃക്ഷങ്ങളാണ്. സ്ഥിരം മരങ്ങളില്‍ നിന്നുള്ള മൊത്തം ഉല്‍പാദനം 9,98,900 ടണ്ണിലെത്തി, സ്ഥിരം മരങ്ങളില്‍ നിന്നുള്ള മൊത്തം ഉല്‍പാദനം കഴിഞ്ഞ വര്‍ഷം 2.7 ശതമാനം തോതില്‍ വര്‍ധിച്ചു. സ്ഥിരം മരങ്ങളുടെ പട്ടികയില്‍ ഒലീവ് മരങ്ങളാണ് ഒന്നാം സ്ഥാനത്ത്. സൗദിയില്‍ ഏകദേശം 2.15 കോടി ഒലീവ് മരങ്ങളുണ്ട്. ഇവ പ്രതിവര്‍ഷം 3,51,700 ടണ്‍ ഒലീവ് ഉല്‍പാദിപ്പിക്കുന്നു. രണ്ടാം സ്ഥാനത്ത് മുന്തിരി വള്ളികളാണ്. സൗദിയില്‍ 73 ലക്ഷം മുന്തിര മരങ്ങളുണ്ട്. ഇവ പ്രതിവര്‍ഷം 1,25,500 ടണ്‍ മുന്തിരി ഉല്‍പാദിപ്പിക്കുന്നു.
ജൈവ കൃഷിയുടെ ആകെ വിസ്തീര്‍ണം 24,100 ഹെക്ടറിലെത്തി. ഈന്തപ്പനകള്‍ ഒഴികെയുള്ള സ്ഥിരം മരങ്ങളുടെ ജൈവ കൃഷി 12,500 ഹെക്ടറായി ഉയര്‍ന്നു. ആകെ ജൈവകൃഷി വിസ്തൃതിയുടെ 52 ശതമാനം ഈന്തപ്പനകള്‍ ഒഴികെയുള്ള സ്ഥിരം മരങ്ങളാണ്. ഏകദേശം 6,200 ഹെക്ടറില്‍ ഈന്തപ്പന ജൈവ കൃഷിയുണ്ട്. ജൈവ വിളകളുടെ ആകെ ഉല്‍പാദനം 98,300 ടണ്ണായി ഉയര്‍ന്നു. 2023 നെ അപേക്ഷിച്ച് കഴിഞ്ഞ വര്‍ഷം ജൈവ വിളകളുടെ ആകെ ഉല്‍പാദനത്തില്‍ മൂന്നു ശതമാനം വര്‍ധന രേഖപ്പെടുത്തി.
കഴിഞ്ഞ വര്‍ഷം സൗദിയിലേക്കുള്ള മൊത്തം കാര്‍ഷിക ഇറക്കുമതി 18.76 ലക്ഷം ടണ്ണിലെത്തി. 2023 നെ അപേക്ഷിച്ച് 2024 ല്‍ കാര്‍ഷിക ഇറക്കുമതി 10.8 ശതമാനം തോതില്‍ വര്‍ധിച്ചു. കാര്‍ഷിക ഇറക്കുമതിയില്‍ ധാന്യങ്ങളാണ് മുന്‍പന്തിയില്‍. മൊത്തം ഇറക്കുമതിയുടെ 72.1 ശതമാനം ധാന്യങ്ങളാണ്.
ലോകത്തെ 111 രാജ്യങ്ങളിലേക്ക് സൗദി ഈത്തപ്പഴം കയറ്റി അയക്കുന്നുണ്ടെന്ന് പരിസ്ഥിതി, ജല, കൃഷി മന്ത്രിയും ഇന്റര്‍നാഷണല്‍ ഡേറ്റ്‌സ് കൗണ്‍സില്‍ ചെയര്‍മാനുമായ എന്‍ജിനീയര്‍ അബ്ദുറഹ്മാന്‍ അല്‍ഫദ്ലി വെളിപ്പെടുത്തി. കഴിഞ്ഞ വര്‍ഷം 170 കോടി റിയാലിന്റെ ഈത്തപ്പഴം സൗദി അറേബ്യ ലോക രാജ്യങ്ങളിലേക്ക് കയറ്റി അയച്ചു. ഈത്തപ്പഴ കയറ്റുമതിയില്‍ സൗദി അറേബ്യ ഒന്നാം സ്ഥാനത്താണെന്നും മന്ത്രി പറഞ്ഞു.