ദോഹ – 2025-26 സാമ്പത്തിക വര്ഷത്തില് ഖത്തര് എയര്വേയ്സ് ലാഭത്തില് വന് ഇടിവ്. കഴിഞ്ഞ സാമ്പത്തിക വര്ഷത്തില് കമ്പനി ലാഭം 708 കോടി ഖത്തര് റിയാലായി (194 കോടി ഡോളര്) ആയി കുറഞ്ഞു. തൊട്ടു മുന് വര്ഷത്തെ അപേക്ഷിച്ച് 7 ശതമാനം കുറവാണിത്. ഭൗമരാഷ്ട്രീയ തടസ്സങ്ങളും വ്യോമമേഖലയുടെ അടച്ചുപൂട്ടലുകളും മിഡില് ഈസ്റ്റിലെ പ്രധാന ആഗോള ഗതാഗത കേന്ദ്രങ്ങളിലൊന്നായ ദോഹയുടെ പങ്കിനെ ബാധിച്ചു. സുപ്രധാന ഭൗമരാഷ്ട്രീയ സംഭവങ്ങള് സാമ്പത്തിക വര്ഷത്തിലെ അവസാന മാസത്തെ പ്രവര്ത്തനത്തെ ബാധിച്ചതായി സര്ക്കാര് ഉടമസ്ഥതയിലുള്ള വിമാന കമ്പനി പറഞ്ഞു. കഴിഞ്ഞ സാമ്പത്തിക വര്ഷത്തില് ഖത്തര് എയര്വേയ്സ് യാത്രക്കാരുടെ എണ്ണം 4.18 കോടിയിലെത്തി. അന്താരാഷ്ട്ര വിമാന സര്വീസ് ഷെഡ്യൂള് പുനഃസ്ഥാപിക്കുന്നത് കമ്പനി തുടരുന്നു.
കോവിഡ്-19 മഹാമാരിക്ക് ശേഷമുള്ള ഏറ്റവും വലിയ വ്യോമയാന പ്രതിസന്ധികളിലൊന്നിന് യു.എസ്-ഇസ്രായില്-ഇറാന് യുദ്ധം കാരണമായി. സംഘര്ഷം രൂക്ഷമായതിനുശേഷം മിഡില് ഈസ്റ്റിന്റെ ചില ഭാഗങ്ങളില് വ്യോമമേഖലകള് താല്ക്കാലികമായി അടച്ചുപൂട്ടിയത് ആയിരക്കണക്കിന് വിമാന സര്വീസുകള് റദ്ദാക്കാനും റൂട്ട് തടസ്സപ്പെടാനും ഇടയാക്കി. പ്രതിസന്ധിയുടെ സമയത്ത്, നെറ്റ്വര്ക്ക് കണക്റ്റിവിറ്റി പുനഃസ്ഥാപിക്കാനായി ഖത്തര് എയര്വേയ്സ് പ്രത്യേക വിമാന സര്വീസുകള് നടത്തി. എയര്ലൈന് അടുത്തിടെയാണ് യു.എ.ഇ സര്വീസ് പുനരാരംഭിച്ചത്. മെയ് 13 ന് ദോഹക്കും അബുദാബിക്കും ഇടയിലുള്ള വിമാന സര്വീസ് ഖത്തര് എയര്വേയ്സ് പുനരാരംഭിച്ചു. ഇപ്പോള് ആഗോള വിമാന സര്വീസ് ഷെഡ്യൂള് പുനഃസ്ഥാപിച്ചുവരികയാണെന്നും 2026 വേനല്ക്കാലത്തോടെ 160 ലധികം ലക്ഷ്യസ്ഥാനങ്ങളിലേക്ക് സര്വീസ് നടത്തുമെന്ന് പ്രതീക്ഷിക്കുന്നതായും ഖത്തര് എയര്വേയ്സ് വ്യക്തമാക്കി.
കഴിഞ്ഞ സാമ്പത്തിക വര്ഷം വിമാന കമ്പനിയെ പ്രവര്ത്തനപരമായും സാമ്പത്തികമായും പരീക്ഷിച്ചതായി അടുത്തിടെ നിയമിതനായ ഖത്തര് എയര്വേയ്സ് ഗ്രൂപ്പ് സി.ഇ.ഒ ഹമദ് അല്ഖാതര് ചൂണ്ടികാട്ടി. ഒരു സ്ഥാപനത്തിന് നേടാന് കഴിയുന്നതിന്റെ ഏറ്റവും മികച്ചതും അതിന് നേരിടാന് കഴിയുന്നതിന്റെ ആഴവും പ്രകടിപ്പിക്കാന് ഒരു സാമ്പത്തിക വര്ഷം ആവശ്യപ്പെടുന്നത് അപൂര്വമാണ്. 2025-26 സാമ്പത്തിക വര്ഷം രണ്ടും ചെയ്തു. ഞങ്ങളുടെ ആഗോള ശൃംഖല ഞങ്ങള് സജീവമായി പുനര്നിര്മ്മിക്കുന്നു. ഞങ്ങള് യഥാര്ഥ സമ്മര്ദ്ദത്തിലാണെന്ന് ഹമദ് അല്ഖാതര് പറഞ്ഞു.
കഴിഞ്ഞ സാമ്പത്തിക വര്ഷത്തില് തങ്ങളുടെ കാര്ഗോ ഡിവിഷന് 14.3 ലക്ഷം ടണ് ചരക്ക് നീക്കം ചെയ്തതായി ഖത്തര് എയര്വേയ്സ് അറിയിച്ചു. ഇത് ആഗോള വ്യോമ കാര്ഗോ വിപണിയുടെ 12 ശതമാനമാണ്. ഖത്തര് എയര്വേയ്സ് 86 ശതമാനം സര്വീസ് സമയനിഷ്ഠ പാലിച്ചു. ലോകത്തിലെ ഏറ്റവും കൃത്യനിഷ്ഠ പാലിക്കുന്ന അന്താരാഷ്ട്ര വിമാനക്കമ്പനികളില് ഒന്നായി കമ്പനി മാറി. ഈ വര്ഷത്തെ ഏറ്റവും വലിയ തന്ത്രപരമായ പ്രഖ്യാപനങ്ങളിലൊന്ന് പ്രധാന വിമാനനിര പ്രതിബദ്ധതയായിരുന്നു. ബോയിംഗ്, ജി.ഇ എയ്റോസ്പേസ് എന്നിവയുമായി 210 വിമാനങ്ങളും 400 എന്ജിനുകളും ഉള്ക്കൊള്ളുന്ന കരാറുകളില് ഖത്തര് എയര്വേയ്സ് ഒപ്പുവെച്ചു. പ്രാദേശിക തടസ്സങ്ങള്ക്ക് ശേഷം 2026 വേനല്ക്കാല ഷെഡ്യൂള് നെറ്റ്വര്ക്ക് ആഴം പുനഃസ്ഥാപിക്കുന്നതില് ശ്രദ്ധ കേന്ദ്രീകരിക്കുമെന്ന് എയര്ലൈന് പറഞ്ഞു.