ദോഹ – ഖത്തർ ജനറൽ ഇലക്ട്രിസിറ്റി ആൻഡ് വാട്ടർ കോർപ്പറേഷന്റെ (കഹ്റാമ) ജീവനക്കാർക്ക് മാത്രമായി മെഡിക്കൽ ക്ലിനിക് ആരംഭിച്ചു. പ്രൈമറി ഹെൽത്ത് കെയർ കോർപ്പറേഷനുമായി (പിഎച്ച്സിസി) സഹകരിച്ച് തുടക്കം കുറിച്ച ‘കഹ്റാമ മെഡിക്കൽ ക്ലിനിക് ഫോർ എംപ്ലോയീസ്’ കഴിഞ്ഞ ദിവസം കഹ്റാമ അബു ഹമൂർ കോംപ്ലക്സിൽ ഉദ്ഘാടനം ചെയ്തു.
ആരോഗ്യകരവും സുരക്ഷിതവുമായ തൊഴിൽ അന്തരീക്ഷം പ്രദാനം ചെയ്യുക, കോർപ്പറേഷൻ ജീവനക്കാർക്ക് ആരോഗ്യ അവബോധ പരിപാടികൾ സംഘടിപ്പിക്കുക അതുവഴി ജീവനക്കാരുടെ ശാരീരികവും മാനസികവുമായ ക്ഷേമം വർദ്ധിപ്പിക്കുക എന്ന ലക്ഷ്യത്തോടെയാണ് ക്ലിനിക് ആരംഭിച്ചത്. ഇതുവഴി ജീവനക്കാരിൽ നിന്നും മെച്ചപ്പെട്ട ജോലി പ്രകടനം ഉറപ്പാക്കാൻ സാധിക്കും. ഖത്തർ ജനറൽ ഇലക്ട്രിസിറ്റി ആൻഡ് വാട്ടർ കോർപ്പറേഷൻ (കഹ്റാമ) പ്രൈമറി ഹെൽത്ത് കെയർ കോർപ്പറേഷനുമായി (പിഎച്ച്സിസി) ഒപ്പുവച്ച ധാരണാപത്രത്തിന്റെ ഭാഗമായാണ് പുതിയ ക്ലിനിക് ആരംഭിച്ചത്.
ഉദ്ഘാടന ചടങ്ങിൽ കഹ്റാമ പ്രസിഡന്റ് എഞ്ചിനീയർ അബ്ദുള്ള ബിൻ അലി അൽതിയാബ്, പ്രൈമറി ഹെൽത്ത് കെയർ കോർപ്പറേഷൻ (പിഎച്ച്സിസി) മാനേജിംഗ് ഡയറക്ടർ ഡോ. മറിയം അബ്ദുൾ മാലിക്, പിഎച്ച്സിസിയിലെ ഡോക്ടർമാർ, ഉയർന്ന ഉദ്യോഗസ്ഥർ കഹ്റാമ ഡയറക്ടർമാർ തുടങ്ങിയവർ പങ്കെടുത്തു.
ഈ ക്ലിനിക്ക്, ജീവനക്കാർക്ക് ആരോഗ്യകരവും സുരക്ഷിതവുമായ അന്തരീക്ഷം പ്രദാനം ചെയ്യനും ജീവനക്കാരുടെ ക്ഷേമം മെച്ചപ്പെടുത്തുന്നതിനും അതുവഴി ജീവനക്കാരുടെ ഉൽപ്പാദനക്ഷമത വർധിപ്പിക്കുന്നതിനും സഹായകരമാകുമെന്ന് കഹ്റാമയുടെ പ്രസിഡന്റ് എഞ്ചിനീയർ അബ്ദുള്ള ബിൻ അലി അൽതിയാബ് പറഞ്ഞു. കഹ്റാമ മെഡിക്കൽ ക്ലിനിക് ഫോർ എംപ്ലോയീസ്’ എന്ന നേട്ടം വിവിധ സർക്കാർ സ്ഥാപനങ്ങളുമായുള്ള സഹകരണ പ്രക്രിയയിൽ ഒരു ഗുണപരമായ കുതിച്ചുചാട്ടത്തെ പ്രതിനിധീകരിക്കുന്നതാണെന്നും ഇത് ഖത്തർ നാഷണൽ വിഷൻ 2030, നാഷണൽ ഹെൽത്ത് സ്ട്രാറ്റജി 2024-2030 എന്നിവയെ പിന്തുണയ്ക്കുന്നതാണെന്നും പിഎച്ച്സിസി മാനേജിംഗ് ഡയറക്ടർ ഡോ. മറിയം അബ്ദുൾ മാലിക് പറഞ്ഞു. പുതിയ മെഡിക്കൽ ക്ലിനിക് വന്നതോടെ മലയാളികൾ ഉൾപ്പെടെ കഹ്റമയിൽ ജോലി ചെയ്യുന്ന നിരവധി ജീവനക്കാർക്ക് ഈ സൗകര്യം ഏറെ ഉപകാരപ്രദമാകും .