റിയാദ് – സൗദിയില്‍ വ്യവസായ മേഖലയിലെ സ്വദേശി ജീവനക്കാരില്‍ മൂന്നിലൊന്ന് വനിതകളാണെന്ന് വ്യവസായ, ധാതുവിഭവ മന്ത്രി ബന്ദര്‍ അല്‍ഖുറൈഫ്. രാജ്യത്ത് വ്യാവസായിക മേഖല വലിയ പരിവര്‍ത്തനത്തിന് സാക്ഷ്യംവഹിക്കുകയാണെന്നും അദ്ദേഹം വ്യക്തമാക്കി. സ്വദേശി വനിതകള്‍ ഫാക്ടറികളിലും വ്യാവസായിക മേഖലകളിലും മാനേജ്‌മെന്റ് തസ്തികകള്‍ വഹിക്കുകയും വ്യവസായത്തിന്റെയും സാങ്കേതികവിദ്യയുടെയും ഭാവി രൂപപ്പെടുത്തുന്നതില്‍ പങ്കാളികളാകുകയും ചെയ്യുന്നു. വ്യാവസായിക മേഖലയിലെ ഈ ചരിത്രപരമായ പരിവര്‍ത്തനം സമീപ വര്‍ഷങ്ങളില്‍ സൗദി അറേബ്യ കൈവരിച്ച പുരോഗതി പ്രതിഫലിപ്പിക്കുന്നതായി റിയാദില്‍ നടന്ന യുനൈറ്റഡ് നേഷന്‍സ് ഇന്‍ഡസ്ട്രിയല്‍ ഡെവലപ്‌മെന്റ് ഓര്‍ഗനൈസേഷന്‍ പൊതുസമ്മേളനത്തില്‍ നടത്തിയ പ്രസംഗത്തില്‍ ബന്ദര്‍ അല്‍ഖുറൈഫ് വിശദീകരിച്ചു. വ്യവസായത്തിന്റെ ഭാവിയിലേക്ക് സംഭാവന നല്‍കാന്‍ ആഗ്രഹിക്കുന്ന ഓരോ സ്ത്രീക്കും പരിശീലനവും പിന്തുണയും നല്‍കിക്കൊണ്ട് ഈ വികസനത്തിന്റെ തുടര്‍ച്ച ഉറപ്പാക്കാന്‍ വ്യവസായ, ധാതുവിഭവ മന്ത്രാലയം പ്രതിജ്ഞാബദ്ധമാണ്.
വ്യവസായ മേഖലാ വികസനത്തില്‍ യുവതലമുറയുടെ ശാക്തീകരണം കേന്ദ്രബിന്ദുവാണ്. ധാതുവിഭവ, വ്യവസായ മേഖലകളില്‍ തന്ത്രപരമായ സംരംഭങ്ങള്‍ക്കും പ്രോഗ്രാമുകള്‍ക്കും സൗദി യുവാക്കള്‍ നേതൃത്വം നല്‍കുന്നുണ്ട്. ദേശീയ പ്രതിഭകളെ ശാക്തീകരിക്കാനും ഇന്നൊവേഷനെയും സംരംഭകത്വത്തെയും പിന്തുണക്കുന്ന ആഗോള ബന്ധങ്ങള്‍ കെട്ടിപ്പടുക്കാനുമാണ് ധാതുവിഭവ, വ്യവസായ മേഖലകളില്‍ തന്ത്രപരമായ സംരംഭങ്ങളും പ്രോഗ്രാമുകളും രൂപകല്‍പ്പന ചെയ്തിരിക്കുന്നത്. യുവപ്രതിഭകള്‍ക്ക് ആഗോളതലത്തില്‍ മത്സരിക്കാനും നേതൃത്വം വഹിക്കാനുള്ള ആത്മവിശ്വാസം നല്‍കാനും സഹായിക്കുന്ന നിലക്ക് സൗദി അറേബ്യ വിദ്യാഭ്യാസം, ഗവേഷണം, നൂതന സാങ്കേതികവിദ്യകള്‍ എന്നിവയില്‍ നിക്ഷേപങ്ങള്‍ നടത്തുന്നു.
സാങ്കേതികവിദ്യയും സുസ്ഥിരതയും പരസ്പരവിരുദ്ധമായ ലക്ഷ്യങ്ങളല്ല. മറിച്ച്, ആധുനിക വ്യവസായം കെട്ടിപ്പടുക്കാനുള്ള പരസ്പര പൂരക ഘടകങ്ങളാണ്. ഉല്‍പ്പാദനക്ഷമത വര്‍ധിപ്പിക്കാനായി രാജ്യം കൃത്രിമബുദ്ധി, ഓട്ടോമേഷന്‍, സ്മാര്‍ട്ട് വ്യവസായങ്ങള്‍ എന്നിവയില്‍ നിക്ഷേപങ്ങള്‍ നടത്തുന്നുണ്ട്. ഇതോടൊപ്പം ഊര്‍ജ പരിവര്‍ത്തനം ത്വരിതപ്പെടുത്തുന്നതിന് സര്‍ക്കുലാര്‍ കാര്‍ബണ്‍ ഇക്കോണമി തത്വം സൗദി അറേബ്യ സ്വീകരിക്കുന്നുണ്ട്.
തൊഴിലവസരങ്ങള്‍ സൃഷ്ടിക്കാനും ഭാവി തലമുറകള്‍ക്കായി പരിസ്ഥിതി സംരക്ഷിക്കാനും പ്രാപ്തിയുള്ള കാര്യക്ഷമവും മലിനീകരണം കുറഞ്ഞതുമായ വ്യാവസായിക അടിത്തറ കെട്ടിപ്പടുക്കുക എന്നതാണ് ലക്ഷ്യം. നിക്ഷേപത്തെ ഇന്നൊവേഷനുമായി ബന്ധിപ്പിക്കുന്ന, അഭിലാഷത്തെ സ്വാധീനവുമായി ബന്ധിപ്പിക്കുന്ന, ഉള്‍ക്കൊള്ളല്‍, സ്ത്രീ ശാക്തീകരണം എന്നിവ പ്രോത്സാഹിപ്പിക്കുന്ന, യുവാക്കളെ പ്രചോദിപ്പിക്കുന്ന, അന്താരാഷ്ട്ര സഹകരണത്തിനുള്ള അവസരങ്ങള്‍ വികസിപ്പിക്കുന്ന സംഭാഷണം, പ്രവര്‍ത്തനം, പങ്കാളിത്തം കെട്ടിപ്പടുക്കല്‍ എന്നിവക്കുള്ള അവസരമായി സമ്മേളനത്തിന്റെ മൂന്ന് സെഷനുകള്‍ മാറണമെന്ന് ബന്ദര്‍ അല്‍ഖുറൈഫ് ആവശ്യപ്പെട്ടു.