ദോഹ– കുടുംബവുമൊത്തുള്ള പ്രവാസ ജീവിതം സ്വപ്നത്തിൽ മാത്രം താലോലിച്ചിരുന്ന 15 പേർക്ക് സ്വപ്നസാഫല്യമായി “ഫോർ മൈ ലവ്”. കാൽനൂറ്റാണ്ടിലധികമായി പ്രവാസ ജീവിതം നയിച്ചിട്ടും തന്റെ പ്രിയപെട്ടവരെ ഒരിക്കൽ പോലും ഖത്തറിൽ എത്തിക്കാൻ സാധിക്കാത്ത 15 പേർക്ക് അവരുടെ ഭാര്യമാരേയോ മാതാക്കളെയോ ഖത്തറിൽ എത്തിക്കാൻ അവസരമൊരുക്കിയത് ഖത്തറിലെ ക്യൂ എഫ് എം റേഡിയോ നെറ്റ് വർക്കിൻ്റെ ഭാഗമായ റേഡിയോ മലയാളം 98.6 എഫ് എമാണ് . റേഡിയോ മലയാളം 98.6 എഫ് എം-ന്റെ സാമൂഹ്യ ഉത്തരവാദിത്വ (CSR) പദ്ധതിയിലൂടെയാണ് മുഴുവൻ ചെലവും വഹിച്ചുകൊണ്ടുള്ള ഈ ഖത്തർ സന്ദർശനം ഒരുക്കിയത്. “ഫോർ മൈ ലവ്” എന്ന പേരിൽ സംഘടിപ്പിക്കുന്ന ക്യാമ്പയിന്റെ ആറാമത്തെ പതിപ്പാണിത് .
ഹോളിഡേ ഇൻ ദോഹയിൽ നടന്ന സ്വീകരണ ചടങ്ങിൽ, 30 വർഷത്തിലധികമായി ഖത്തറിൽ സേവനം അനുഷ്ഠിക്കുന്ന പ്രവാസികളുടെ ജീവിതപങ്കാളികളായ 15 വനിതകളെയാണ് ആദരിച്ചത്. സാമ്പത്തിക പരിമിതികൾ മൂലം കുടുംബസമേതം ജീവിക്കാൻ സാധിക്കാതെ “വിവാഹിത ബാച്ചിലർ” ജീവിതം നയിച്ച നിരവധി പ്രവാസികളുടെ കുടുംബങ്ങളാണ് ഈ പദ്ധതിയുടെ ഭാഗമായത്.
ചടങ്ങിന്റെ ഔദ്യോഗിക ഉദ്ഘാടനം ഇന്ത്യൻ എംബസി ഡെപ്യൂട്ടി ചീഫ് ഓഫ് മിഷൻ സന്ദീപ് കുമാർ നിർവഹിച്ചു. ഇന്ത്യയുടെയും മിഡിൽ ഈസ്റ്റിന്റെയും വികസനത്തിൽ ദശാബ്ദങ്ങളായി കഠിനാധ്വാനത്തിലൂടെയും ത്യാഗങ്ങളിലൂടെയും നിർണായക പങ്ക് വഹിച്ച ഒരു തലമുറയ്ക്കുള്ള അർത്ഥവത്തായ ആദരവാണിതെന്ന് അദ്ദേഹം അഭിപ്രായപ്പെട്ടു. ക്യൂ എഫ് എം റേഡിയോ നെറ്റ് വർക്ക് വൈസ് ചെയർമാനും മാനേജിംഗ് ഡയറക്ടറുമായ കെ.സി. അബ്ദുൽ ലത്തീഫ് അധ്യക്ഷ പ്രസംഗം നടത്തി . “ഫോർ മൈ ലവ്” പരിപാടി ഖത്തറിന്റെ വിശാല നയങ്ങളോടും, ഉത്തരവാദിത്തമുള്ള മാധ്യമ പ്രവർത്തനത്തെക്കുറിച്ചുള്ള റേഡിയോ മാനേജ്മെന്റിന്റെ കാഴ്ചപ്പാടിനോടും ചേർന്ന് നിൽക്കുന്നതാണെന്ന് അദ്ദേഹം വ്യക്തമാക്കി. സമൂഹത്തിലെ പ്രമുഖ നേതാക്കളും വിവിധ അപ്പെക്സ് സംഘടനകളുടെയും ബിസിനസ് സ്ഥാപനങ്ങളുടെയും പ്രതിനിധികളും ചടങ്ങിൽ പങ്കെടുത്തു.
സി.വി. റപ്പായി (ഡയറക്ടർ, നോർക്ക), ത്വാഹ അബ്ദുൽ കരീം (പ്രസിഡന്റ്, ഐ ബി പി സി), എബ്രഹാം ജോസഫ് (ജനറൽ സെക്രട്ടറി, ഐ സി സി),
ഹംസ യൂസഫ് (ജനറൽ സെക്രട്ടറി, ഐ എസ് സി), പി.എൻ. ബാബുരാജ് (മുൻ പ്രസിഡന്റ്, ഐ സി സി & ഐസി ബിഎഫ്), ഷഹീൻ ഷാഫി (പ്രസിഡന്റ്, കെ ബി എഫ് ) തുടങ്ങിയവർ ആശംസാ പ്രസംഗങ്ങൾ നടത്തി.
സന്ദർശനത്തിനെത്തിയ ഭാര്യമാർക്കും മാതാക്കൾക്കും അവരുടെ ത്യാഗങ്ങൾക്കുള്ള അംഗീകാരമായി പ്രത്യേക സ്മരണികകളും സമ്മാനങ്ങളും നൽകി. ദമ്പതികളും അമ്മമാരും തങ്ങളുടെ ജീവിതാനുഭവങ്ങൾ സദസുമായി പങ്കുവച്ചു. പരിപാടിക്ക് സാംസ്കാരിക മികവ് പകർന്നുകൊണ്ട് പ്രശസ്ത കാലിഗ്രാഫി ആർട്ടിസ്റ്റ് കരീം ഗ്രാഫി സ്ത്രീത്വത്തെ ആസ്പദമാക്കി ‘ലൈവ് ആർട്ടിസ്റ്റിക് ട്രിബ്യൂട്ട്’ അവതരിപ്പിച്ചു. അലൻ, ശ്രീകാന്ത്, പ്രതാപ്, മോജിൻ എന്നിവർ സംഗീതാവിഷ്കാരം നടത്തി. റേഡിയോ സി.ഇ.ഒ അൻവർ ഹുസൈൻ സ്വാഗതവും ഡി.ജി.എം – സെയിൽസ് & മാർക്കറ്റിംഗ് നൗഫൽ അബ്ദുറഹ്മാൻ നന്ദിയും പറഞ്ഞു. ഇന്ത്യൻ സമൂഹത്തിലെ പ്രമുഖർ, മാധ്യമ പ്രതിനിധികൾ, ബിസിനസ് നേതാക്കൾ, ക്ഷണിതാക്കൾ തുടങ്ങിയവർ സ്വീകരണച്ചടങ്ങിൽ പങ്കെടുത്തു. റേഡിയോ ശ്രോതാക്കൾ സമർപ്പിക്കുന്ന നാമനിർദ്ദേശങ്ങളിൽ നിന്നാണ് ഫോർ മൈ ലവ് ഗുണഭോക്താക്കളെ തിരഞ്ഞെടുക്കുന്നത്.