റിയാദ്: സൗദി പ്രവാസി വിദ്യാര്‍ഥികളുടെ ചിരകാല സ്വപ്നമായ മെഡിക്കല്‍ എഞ്ചിനീയറിംഗ് എന്‍ട്രന്‍സ് പരീക്ഷ പരിശീലനത്തിനുള്ള ഓഫ്‌ലൈന്‍ കോച്ചിങ് സെന്റര്‍ റിയാദ് മോഡേണ്‍ സ്‌കൂളില്‍ ആരംഭിച്ചു. സൗദിയിലെ ഇന്ത്യന്‍ വിദ്യാര്‍ഥികളുടെ തുടര്‍ പഠനത്തിനുള്ള എല്ലാ സാധ്യതകളും ലഭ്യമാക്കുക എന്ന ലക്ഷ്യത്തോടെ സൗദിയില്‍ രജിസ്റ്റര്‍ ചെയ്ത എഡ്യൂക്കേഷന്‍ പാര്‍ട്ട്‌നേഴ്‌സ് കമ്പനി ആണ് ഇന്ത്യയിലെ പ്രമുഖ എന്‍ട്രന്‍സ് പരീക്ഷ പരിശീലന സ്ഥാപനമായ ആസ്‌ക് ഐ ഐ ടിയന്‍സുമായി ചേര്‍ന്ന് വിദ്യാഭ്യാസ മന്ത്രാലയത്തിന്റെ അംഗീകാരത്തോടെ കോച്ചിങ് ആരംഭിക്കുന്നത്.
ദമാമില്‍ അല്‍മുന ഇന്റര്‍നാഷണല്‍ സ്‌കൂളുമായും ജുബൈലില്‍ ദമാം ഡ്യൂണ്‍സ് സ്‌കൂളുമായും സഹകരിച്ച് കഴിഞ്ഞ വര്‍ഷമാണ് ഈ പദ്ധതി ആരംഭിച്ചത്. സൗദിയില്‍ ഇതാദ്യമായാണ് വിദ്യാഭ്യാസ മന്ത്രാലയത്തിന്റെ അംഗീകാരത്തോടെ കോച്ചിങ് ആരംഭിക്കുന്നതെന്ന് എഡ്യൂക്കേഷന്‍ പാര്‍ട്ടണേഴ്‌സ് കമ്പനി സിഇഒ ഡോ. ടി.പി മുഹമ്മദ്, ആസ്‌ക് ഐ ഐ ടിയന്സ് ചീഫ് കോഓര്‍ഡിനേറ്റര്‍ ഹര്‍ഷ് പട്ടോഡിയ എന്നിവര്‍ റിയാദില്‍ നടത്തിയ വാര്‍ത്താസമ്മേളനത്തില്‍ അറിയിച്ചു.
2007 മുതല്‍ 90 ഇല്‍ അധികം മുന്‍ ഐ ഐ ടിയന്മാരും മുപ്പതിലധികം മെഡിക്കല്‍ രംഗത്തെ പ്രമുഖരും ചേര്‍ന്ന് ഇന്ത്യയില്‍ ഡല്‍ഹി ആസ്ഥാനമായി നടത്തിവരുന്ന ഉന്നത നിലവാരം പുലര്‍ത്തുന്ന പ്രമുഖ സഥാപനമാണ് ആസ്‌ക് ഐ ഐ ടിയന്സ്. കഴിഞ്ഞ പത്തു വര്‍ഷമായി ഓണ്‍ലൈന്‍ സംവിധാനത്തില്‍ സൗദിയിലുള്ള ഇന്ത്യന്‍ വിദ്യാര്‍ഥികള്‍ക്ക് നീറ്റ്, ജെഇഇ തുടങ്ങിയ പരീക്ഷകളില്‍ പരിശീലനം നല്‍കി മികച്ച വിജയം കാഴ്ച വെച്ച സ്ഥാപനമാണിത്. സ്കൂള് സമയം കഴിഞ്ഞായിരിക്കും സ്‌കൂളുകളില്‍ ഫിസിക്കല്‍ ക്ലാസുകള്‍ നടക്കുക. ഉച്ച കഴിഞ്ഞുള്ള സമയങ്ങളില്‍ വിദ്യാലയങ്ങള്‍ ഈ ആവശ്യങ്ങള്‍ക്കായി ഉപയോഗപ്പെടുത്താനുള്ള അനുമതി കൂടി സ്ഥാപനങ്ങള്‍ക്കു ലഭിച്ചു കഴിഞ്ഞു.
ഇന്ത്യയില്‍ നിന്നുള്ള പരിചയസമ്പന്നരായ ഐഐടിയിലെ അധ്യാപകര്‍, വിശകലനത്തോടുകൂടിയ റെഗുലര്‍ ടെസ്റ്റ് സീരീസ്, പതിവ് സംശയ നിവാരണവും ഗൃഹപാഠവും, കരിയര്‍ കൗണ്‍സിലിംഗ്, സ്വയംപഠനവും പുനരവലോകനവും, ചെറിയ ബാച്ചുകള്‍, ആറാം കഌസ് മുതലുള്ള കുട്ടികള്‍ക്കു ഫൗണ്ടേഷന്‍ ക്ലാസുകള്‍ എന്നിവയാണ് സംരംഭത്തിന്റെ പ്രത്യേകതകള്‍.
കോച്ചിങ്ങുമായി ബന്ധപ്പെട്ട അന്യോഷണത്തിനുമായി എല്ലാ ദിവസവും രാത്രി 8 മാണി വരെ ദമ്മാം അല്‍ മുന സ്‌കൂളിലും ജുബൈല്‍ ഡ്യൂണ്‍സ് സ്‌കൂളിലും റിയാദ് മോഡേണ്‍ ഇന്റര്‍നാഷണല്‍ സ്‌കൂളിലും എഡ്യൂക്കേഷന്‍ പാര്‍ട്നേഴ്സ് ടീമിന്റെ സേവനം ലഭ്യമായിരിക്കും. റിയാദ് ബ്രാഞ്ചിന്റെ ലോഞ്ചിങ് റിയാദ് ക്രൗണ്‍ പ്ലാസ ഹോട്ടലില്‍ നൂറുകണക്കിന് രക്ഷിതാക്കളുടെയും വിദ്യാര്‍ഥികളുടെയും സാന്നിധ്യത്തില്‍ നടന്നു.