കുവൈത്ത് സിറ്റി – വാഹനങ്ങളില്‍ നിന്ന് പണം കവര്‍ന്ന ആഫ്രിക്കന്‍ സംഘം കുവൈത്തിൽ അറസ്റ്റില്‍. ബാങ്കുകളില്‍ നിന്ന് പണം പിന്‍വലിച്ച് പുറത്തിറങ്ങുന്നവരെ രഹസ്യമായി പിന്തുടര്‍ന്ന് പണം കവരുന്നത് പതിവാക്കിയ നാലംഗ സംഘത്തെയാണ് ക്രിമിനല്‍ ഇന്‍വെസ്റ്റിഗേഷന്‍ ഡിപ്പാര്‍ട്ട്‌മെന്റ് അറസ്റ്റ് ചെയ്തത്. വാഹനങ്ങളിൽ നിന്നും ആളുകൾ പുറത്തിറങ്ങുന്ന സമയം നോക്കി ചില്ലുകള്‍ തകര്‍ത്ത് പണമടങ്ങിയ ബാഗുകളും പ്ലാസ്റ്റിക് കീസുകളും കൈക്കലാക്കി രക്ഷപ്പെടുകയാണ് എത്യോപ്യക്കാരായ സംഘം ചെയ്തിരുന്നത്. ഇതേതുടർന്ന് സുരക്ഷാ വകുപ്പുകള്‍ക്ക് ഏതാനും പരാതികൾ ലഭിച്ചു. തുടർന്ന് നടത്തിയ അന്വേഷണത്തിലാണ് പ്രതികളെ തിരിച്ചറിഞ്ഞത്. അല്‍ദജീജ് ഏരിയയിലാണ് സംഘം പ്രധാനമായും കവർച്ച നടത്തിയിരുന്നത്. ബാങ്ക് ഉപയോക്താക്കളെ ലക്ഷ്യമിട്ടായിരുന്നു കവർച്ച.
വ്യാജ നമ്പര്‍ പ്ലേറ്റുകള്‍ സ്ഥാപിച്ച കാറുകളാണ് കവർച്ച നടത്താൻ പ്രതികൾ ഉപയോഗിച്ചിരുന്നത്. ബാങ്ക് പരിസരങ്ങൾ നിരീക്ഷിക്കാൻ പ്രത്യേക സുരക്ഷാ സംഘത്തിന് രൂപംനല്‍കിയിരുന്നു. അല്‍ദജീജ് ഏരിയയിലെ ബാങ്കിനു സമീപം കാര്‍ നിര്‍ത്തി പണം പിന്‍വലിച്ച് പുറത്തിറങ്ങുന്നവരെ നിരീക്ഷിക്കുന്നതിനിടെ നാലു പേരെയും സുരക്ഷാ സൈനികര്‍ കൈയോടെ അറസ്റ്റ് ചെയ്യുകയായിരുന്നു. ചോദ്യം ചെയ്യലിനിടെ കുറ്റസമ്മതം നടത്തിയ പ്രതികള്‍ക്കെതിരെ നിയമനടപടികള്‍ സ്വീകരിച്ചുവരികയാണെന്ന് ആഭ്യന്തര മന്ത്രാലയം അറിയിച്ചു.