തിരൂരങ്ങാടി: കലാ സാമൂഹിക രാഷ്ട്രീയ രംഗങ്ങളിലെ നിറസാന്നിധ്യവും ദർശന ടിവി പ്രോഗ്രാം പ്രൊഡ്യൂസറുമായ മുഹമ്മദ് അക്രം (51) അന്തരിച്ചു. ദർശന ടിവിയിൽ സംപ്രേഷണം ചെയ്ത ‘കുട്ടിക്കുപ്പായം’ റിയാലിറ്റി ഷോ ഡയറക്ടറായിരുന്നു. പെരുവള്ളൂർ പഞ്ചായത്തിലെ തോട്ടശ്ശേരിയറ സ്വദേശിയാണ്. ഹൃദയാഘാതത്തെ തുടർന്ന് കഴിഞ്ഞ ദിവസം കോട്ടക്കലിലെ സ്വകാര്യ ആശുപത്രിയിൽ പ്രവേശിപ്പിക്കപ്പെട്ട അദ്ദേഹം അവിടെ വെച്ചാണ് അന്തരിച്ചത്.
ഇനാഫ് ജനറൽ സെക്രട്ടറിയും കേരള മാപ്പിള അക്കാദമി മുൻ സെക്രട്ടറിയുമായ മുഹമ്മദ് അക്രം മാപ്പിള കലാ സാംസ്‌കാരിക രംഗത്ത് പ്രവർത്തന മികവുകൊണ്ട് വ്യക്തിമുദ്ര പതിപ്പിച്ച വ്യക്തിയാണ്. കലാരംഗത്തുള്ളവരെ പ്രോത്സാഹിപ്പിക്കുന്നതിലും പുതിയ തലമുറയെ കലാസാഹിത്യ സാംസ്‌കാരിക രംഗങ്ങളിൽ പരിശീലിപ്പിക്കുന്നതിനും വേണ്ടി തൻറെ ജീവിതം മുഴുവൻ സമർപ്പിച്ച വ്യക്തിയും കൂടിയായിരുന്നു അദ്ദേഹം.
ജനാസ നമസ്‌കാരം തോട്ടശ്ശേരിയറ ജുമാ മസ്ജിദിൽ.