കോട്ടയം- കേരളത്തിന്റെ പല ഭാഗങ്ങളിലുമായി വീടുകളില്‍ പഴയതുണി ശേഖരിക്കാനെന്ന വ്യാജേന എത്തി ആസൂത്രിതമായി കവര്‍ച്ച നടത്തി വന്നിരുന്ന നാലംഗ സംഘം കോട്ടയത്ത് പിടിയില്‍. തമിഴ്നാട് തിരുനല്‍വേലി കളത്ത് സ്ട്രീറ്റില്‍ ജയറാം, ഭാര്യ നാഗവല്ലി, മധുരൈ നാഗമലയ്കത്ത് തങ്കപാടി, ഭാര്യ വല്ലി ടി ശങ്കരി എന്നിവരാണ് പൊലീസ് പിടിയിലായത്. ഇവരോടൊപ്പമുണ്ടായിരുന്ന ചിലര്‍ ഓടി രക്ഷപ്പെട്ടു. നാല്‍പ്പത്തിയഞ്ചോളം പേരടങ്ങുന്ന വന്‍സംഘമാണ് ഇവരുടേതെന്നും കേരളത്തില്‍ പല പ്രദേശങ്ങളിലുമായി മോഷണം നടത്തിയ കേസുകളുണ്ടെന്നും പൊലീസ് വ്യക്തമാക്കി.
പഴയ തുണി ശേഖരിക്കാനെന്ന് പറഞ്ഞ് സംഘമായി വീടുകളിലെത്തി ആളുകളെ സമീപിക്കുകയാണ് ചെയ്യുക. സ്വര്‍ണ്ണം കൂടുതല്‍ ഉപയോഗിക്കുന്ന സ്ത്രീകളെ കണ്ടെത്തി ശേഷം ആസൂത്രിതമായി ഇത് തട്ടിയെടുത്ത് സ്ഥലംവിടും. സംഘത്തിലെ ആണുങ്ങളാണ് മോഷണത്തില്‍ കിട്ടുന്ന സ്വര്‍ണ്ണവും മറ്റ് സാധനസാമഗ്രികളും വില്‍ക്കുക. ആളുകള്‍ കൂടുന്നിടത്തും ഇവര്‍ സംഘമായെത്തി സ്വര്‍ണ്ണവും പണവും തട്ടിയെടുക്കുന്ന രീതിയുമുണ്ടെന്നും കേരളത്തിലെ വിവിധ പൊലീസ് സ്റ്റേഷനുകളില്‍ ഈ മോഷ്ടാക്കളുടെ ലിസ്റ്റ് കണ്ടെത്തിയിട്ടുണ്ടെന്നും പൊലീസ് വ്യക്തമാക്കി. 45 പേരിലധികവും ദമ്പതിമാരാണെന്നും രണ്ടു മാസം മുമ്പ് രാമപുരം, ഇരട്ടച്ചിറക്ക് സമീപം ബസില്‍ വെച്ച് പ്രായമായ സ്ത്രീയുടെ രണ്ടര പവന്റെ മാല മോഷ്ടിച്ച കേസിലാണ് ഇവരെ പിടികൂടിയതെന്നും രാമപുരം പൊലീസ് പറഞ്ഞു.