പഞ്ചാബിൽ ഡ്യൂട്ടിക്കിടെ പോലീസ് ഉദ്യോഗസ്ഥനെ വെടിവെച്ചു കൊന്നു​

അമൃത്സർ– പഞ്ചാബിലെ അമൃത്സറിൽ ഡ്യൂട്ടിക്ക് പോവുകയായിരുന്ന പോലീസ് ഉദ്യോഗസ്ഥനെ അജ്ഞാതരായ അക്രമികൾ വെടിവെച്ചു കൊലപ്പെടുത്തി. പഞ്ചാബ് പോലീസിലെ അസിസ്റ്റന്റ് സബ് ഇൻസ്പെക്ടർ (ASI) ആയ ജോഗാ സിംഗ് ആണ് കൊല്ലപ്പെട്ടത്. ഇന്ന് പുലർച്ചെ 6:45 ഓടെ അമൃത്സറിലെ മജീതിയ ടൗണിന് സമീപമുള്ള ഹംസ ഗ്രാമത്തിലായിരുന്നു സംഭവം.രാവിലെ തന്റെ ഔദ്യോഗിക ഡ്യൂട്ടിക്കായി പോകുന്നതിനിടെ ബൈക്കിലെത്തിയ രണ്ട് അക്രമികൾ ജോഗാ സിംഗിന് നേരെ വെടിയുതിർക്കുകയായിരുന്നു. വെടിയേറ്റ ഉടൻ തന്നെ അദ്ദേഹം സംഭവസ്ഥലത്തു വച്ച് തന്നെ മരണപ്പെട്ടു. ഗുർദാസ്പൂർ സ്വദേശിയായ ജോഗാ സിംഗിന്റെ വിയോഗവാർത്ത പോലീസ് കുടുംബത്തെ അറിയിച്ചിട്ടുണ്ട്.
​
സംഭവത്തെ തുടർന്ന് പഞ്ചാബിൽ വലിയ രാഷ്ട്രീയ വിവാദങ്ങൾക്കും തുടക്കമായിട്ടുണ്ട്. സംസ്ഥാനത്ത് ക്രമസമാധാന നില തകർന്നുവെന്നും നിയമപാലകർക്ക് പോലും രക്ഷയില്ലെന്നും ആരോപിച്ച് ശിരോമണി അകാലിദൾ നേതാവ് ഭഗവന്ത് മാൻ സർക്കാരിനെതിരെ രംഗത്തുവന്നു. പോലീസ്-രാഷ്ട്രീയ അവിശുദ്ധ കൂട്ടുകെട്ടാണ് ഇത്തരം കൊലപാതകങ്ങൾക്ക് പിന്നിലെന്ന് അകാലിദൾ നേതാവ് മജീതിയ ആരോപിച്ചു. സംഭവത്തിൽ കേസ് രജിസ്റ്റർ ചെയ്ത അമൃത്സർ പോലീസ് പ്രതികൾക്കായി ഊർജ്ജിതമായ അന്വേഷണം ആരംഭിച്ചിട്ടുണ്ട്.