പ്രമുഖ ഇന്ത്യൻ മാധ്യമപ്രവർത്തകൻ സർ മാർക്ക് ടള്ളി അന്തരിച്ചു

ന്യൂഡൽഹി– ഇന്ത്യൻ ചരിത്രത്തിലെ നിർണ്ണായക നിമിഷങ്ങൾ ലോകത്തിന് മുന്നിലെത്തിച്ച വിഖ്യാത ബിബിസി മാധ്യമപ്രവർത്തകൻ സർ മാർക്ക് ടള്ളി (90) അന്തരിച്ചു. വാർദ്ധക്യസഹജമായ അസുഖങ്ങളെത്തുടർന്ന് ഡൽഹിയിലെ സ്വകാര്യ ആശുപത്രിയിലായിരുന്നു അന്ത്യം.
​ഏതാണ്ട് മൂന്ന് പതിറ്റാണ്ടോളം ബിബിസിയുടെ ഇന്ത്യ ബ്യൂറോ ചീഫ് ആയിരുന്ന അദ്ദേഹം, ഇന്ത്യൻ രാഷ്ട്രീയത്തിലെയും സാമൂഹിക ജീവിതത്തിലെയും സ്പന്ദനങ്ങൾ ആഴത്തിൽ മനസ്സിലാക്കിയ വ്യക്തിയായിരുന്നു. 1971-ലെ ബംഗ്ലാദേശ് വിമോചന യുദ്ധം, അടിയന്തരാവസ്ഥ, ഓപ്പറേഷൻ ബ്ലൂ സ്റ്റാർ, ഇന്ദിരാ ഗാന്ധിയുടെയും രാജീവ് ഗാന്ധിയുടെയും വധം, ബാബറി മസ്ജിദ് തകർച്ച തുടങ്ങിയ ചരിത്രസംഭവങ്ങൾ ടള്ളിയുടെ ശബ്ദത്തിലൂടെയാണ് ലോകം അറിഞ്ഞത്.
​
1935-ൽ കൊൽക്കത്തയിൽ ജനിച്ച ടള്ളി, ബ്രിട്ടനിലെ വിദ്യാഭ്യാസത്തിന് ശേഷം 1965-ലാണ് ബിബിസിയിൽ ചേരുന്നത്. ഇന്ത്യയോടുള്ള അദ്ദേഹത്തിന്റെ ആത്മബന്ധം പരിഗണിച്ച് രാജ്യം പത്മശ്രീ, പത്മഭൂഷൺ ബഹുമതികൾ നൽകി ആദരിച്ചിട്ടുണ്ട്. 2002-ൽ ബ്രിട്ടൻ അദ്ദേഹത്തിന് നൈറ്റ്ഹുഡ് (സർ പദവി) നൽകി. ‘നോ ഫുൾ സ്റ്റോപ്സ് ഇൻ ഇന്ത്യ’ (No Full Stops in India), ‘ഇന്ത്യ ഇൻ സ്ലോ മോഷൻ’ തുടങ്ങിയ വിഖ്യാത ഗ്രന്ഥങ്ങളുടെ രചയിതാവ് കൂടിയാണ് അദ്ദേഹം