വാഷിംഗ്ടൺ– ഗാസയിൽ വെടിനിർത്തലിനുള്ള തന്റെ പദ്ധതി സംബന്ധിച്ച് ഹമാസിന് സമയപരിധി നിശ്ചയിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ്. ഞായറാഴ്ചക്കുള്ളിൽ കരാറിലെത്തിയില്ലെങ്കിൽ ഹമാസിന് ഗുരുതരമായ പ്രത്യാഘാതങ്ങൾ ഉണ്ടാകും. അവസാന അവസരമാണിത്. കരാറിലെത്തിയില്ലെങ്കിൽ നരകത്തിന്റെ കവാടങ്ങൾ തുറക്കും. ഞായറാഴ്ച അമേരിക്കൻ സമയം വൈകുന്നേരം ആറു മണിക്കകം കരാർ അംഗീകരിക്കണമെന്നും ട്രംപ് പറഞ്ഞു.
എന്നാൽ യു.എസ് പ്രസിഡന്റിന്റെ പദ്ധതി പഠിക്കാൻ പ്രസ്ഥാനത്തിന് കുറച്ച് സമയം ആവശ്യമാണെന്ന് ഹമാസ് നേതാവ് എഎഫ്പിയോട് പറഞ്ഞു. പദ്ധതിയെ കുറിച്ച് ഇപ്പോഴും കൂടിയാലോചനകൾ തുടരുകയാണ്. കുറച്ച് സമയം ആവശ്യമാണെന്ന് മധ്യസ്ഥരെ അറിയിച്ചിട്ടുണ്ടെന്നും ഹമാസ് നേതാവ് പറഞ്ഞു. പദ്ധതി അംഗീകരിക്കാൻ മൂന്ന് മുതൽ നാല് ദിവസം വരെയാണ് ട്രംപ് സമയം നൽകിയത്. ഗാസ യുദ്ധം അവസാനിപ്പിക്കുകയാണ് തന്റെ പദ്ധതിയുടെ ലക്ഷ്യമെന്നും ട്രംപ് പറഞ്ഞു.