കിംഗ് അബ്ദുൽ അസീസ് ഖുർആൻ മത്സരം: അഞ്ചു ലക്ഷം റിയാൽ ഛാദില്‍ നിന്നുള്ള മുഹമ്മദ് ആദത്തിന്

മക്ക: സൗദി അറേബ്യയുടെ ഇസ്‌ലാമിക കാര്യ, ദഅ്‌വ, മാർഗനിർദേശ മന്ത്രാലയം വിശുദ്ധ ഹറമിൽ സംഘടിപ്പിച്ച 45-ാമത് കിംഗ് അബ്ദുൽ അസീസ് അന്താരാഷ്ട്ര ഖുർആൻ മത്സരത്തിൽ ഒന്നാം വിഭാഗത്തിൽ ഛാദിൽ നിന്നുള്ള മുഹമ്മദ് ആദം മുഹമ്മദ് 5 ലക്ഷം റിയാലിന്റെ ഒന്നാം സമ്മാനം നേടി. സൗദി അറേബ്യയിൽ നിന്നുള്ള അനസ് ബിൻ മാജിദ് അൽ-ഹാസ്മി 4.5 ലക്ഷം റിയാലോടെ രണ്ടാം സ്ഥാനവും, നൈജീരിയയിൽ നിന്നുള്ള സനൂസി ബുഖാരി ഇദ്‌രീസ് 4 ലക്ഷം റിയാലോടെ മൂന്നാം സ്ഥാനവും നേടി.

രണ്ടാം വിഭാഗത്തിൽ സൗദി അറേബ്യയിൽ നിന്നുള്ള മൻസൂർ ബിൻ മിത്അബ് അൽ-ഹർബി (3 ലക്ഷം റിയാൽ), അൾജീരിയയിൽ നിന്നുള്ള അബ്ദുൽവദൂദ് ബിൻ സുദൈർ (2.75 ലക്ഷം റിയാൽ), എത്യോപ്യയിൽ നിന്നുള്ള ഇബ്രാഹിം ഖൈറുദ്ദീൻ മുഹമ്മദ് (2.5 ലക്ഷം റിയാൽ) എന്നിവർ യഥാക്രമം ഒന്ന് മുതൽ മൂന്ന് വരെ സ്ഥാനങ്ങൾ നേടി.

മൂന്നാം വിഭാഗത്തിൽ യെമനിൽ നിന്നുള്ള മുഹമ്മദ് ദമാജ് അൽ-ശുവൈഅ് (2 ലക്ഷം റിയാൽ), ഛാദിൽ നിന്നുള്ള മുഹമ്മദ് കൂസി (1.9 ലക്ഷം റിയാൽ), സെനഗലിൽ നിന്നുള്ള ബദർ ജാൻജ് (1.8 ലക്ഷം റിയാൽ), അമേരിക്കയിൽ നിന്നുള്ള മുഹമ്മദ് അമീൻ ഹസൻ (1.7 ലക്ഷം റിയാൽ), ഫലസ്തീനിൽ നിന്നുള്ള മുഹമ്മദ് കമാൽ മൻസി (1.6 ലക്ഷം റിയാൽ) എന്നിവർ യഥാക്രമം വിജയികളായി.

നാലാം വിഭാഗത്തിൽ ഈജിപ്തിൽ നിന്നുള്ള നാസിർ അബ്ദുൽമജീദ് അമീർ (1.5 ലക്ഷം റിയാൽ), ഇന്തോനേഷ്യയിൽ നിന്നുള്ള ബയോ വിബ്‌സോനോ (1.4 ലക്ഷം റിയാൽ), ലാ റീയൂനിയൻ ദ്വീപിൽ നിന്നുള്ള താഹിർ പട്ടേൽ (1.3 ലക്ഷം റിയാൽ), സൊമാലിയയിൽ നിന്നുള്ള യൂസുഫ് ഹസൻ ഉസ്മാൻ (1.2 ലക്ഷം റിയാൽ), മാലിയിൽ നിന്നുള്ള ബൂബക്കർ ഡിക്കോ (1.1 ലക്ഷം റിയാൽ) എന്നിവർ യഥാക്രമം ഒന്ന് മുതൽ അഞ്ച് വരെ സ്ഥാനങ്ങൾ നേടി.

അഞ്ചാം വിഭാഗത്തിൽ തായ്‌ലൻഡിൽ നിന്നുള്ള അനുയ് ഇന്ററാത്ത് (65,000 റിയാൽ), പോർച്ചുഗലിൽ നിന്നുള്ള സ്വലാഹുദ്ദീൻ ഹുസാം വസാനി (60,000 റിയാൽ), മ്യാൻമറിൽ നിന്നുള്ള ചായിംഗ് വാൻ സു (55,000 റിയാൽ), ബോസ്നിയ-ഹെർസഗോവിനയിൽ നിന്നുള്ള അബ്ദുറഹ്മാൻ അബ്ദുൽമുനിം (50,000 റിയാൽ), കൊസോവോയിൽ നിന്നുള്ള അനീസ് ഷാല (45,000 റിയാൽ) എന്നിവർ യഥാക്രമം വിജയികളായി.

ഓഗസ്റ്റ് 9 മുതൽ 20 വരെ വിശുദ്ധ ഹറമിൽ നടന്ന മത്സരത്തിന്റെ ഫലങ്ങൾ ഇസ്‌ലാമിക കാര്യ മന്ത്രിയും മത്സരത്തിന്റെ സൂപ്പർവൈസർ ജനറലുമായ ശൈഖ് ഡോ. അബ്ദുൽലത്തീഫ് ബിൻ അബ്ദുൽ അസീസ് ആലുശൈഖ് അംഗീകരിച്ചു. 128 രാജ്യങ്ങളിൽ നിന്നുള്ള 179 മത്സരാർഥികൾ അഞ്ച് വിഭാഗങ്ങളിൽ മത്സരിച്ചു. പ്രാഥമിക റൗണ്ടുകളിൽ യോഗ്യത നേടിയവർ മക്കയിലെ ഫൈനൽ റൗണ്ടിൽ പങ്കെടുത്തു.

മത്സരത്തിന്റെ ആകെ സമ്മാനത്തുക 40 ലക്ഷം റിയാലാണ്. ഇതിന് പുറമെ, എല്ലാ മത്സരാർഥികൾക്കുമായി 10 ലക്ഷം റിയാലിന്റെ പ്രത്യേക ഉപഹാരവും വിതരണം ചെയ്തു. മത്സരം അഞ്ച് വിഭാഗങ്ങളിൽ നടന്നു:

1. ഏഴ് മുതവാതിർ ശൈലികളിൽ ഖുർആൻ മുഴുവൻ മനഃപാഠം, കൃത്യമായ പാരായണവും തജ്‌വീദും.
2. ഖുർആന്റെ ആശയ വ്യാഖ്യാനത്തോടെ മുഴുവൻ മനഃപാഠം.
3. തജ്‌വീദ് നിയമങ്ങൾ പാലിച്ച് ഖുർആൻ മുഴുവൻ മനഃപാഠം.
4. തുടർച്ചയായ 15 ജുസ്ഉകൾ മനഃപാഠം, കൃത്യമായ പാരായണവും തജ്‌വീദും.
5. തുടർച്ചയായ 5 ജുസ്ഉകൾ മനഃപാഠം, കൃത്യമായ പാരായണവും തജ്‌വീദും.

48 വര്‍ഷം മുമ്പ് ഹിജ്‌റ 1399 ല്‍ ആണ് ആധുനിക സൗദി അറേബ്യയുടെ ശില്‍പി അബ്ദുല്‍ അസീസ് രാജാവിന്റെ നാമധേയത്തിലുള്ള അന്താരാഷ്ട്ര ഖുര്‍ആന്‍ മത്സരത്തിന് തുടക്കമായത്. ഹിജ്‌റ 1397 ല്‍ തുനീഷ്യയില്‍ നടന്ന യോഗത്തിലാണ് അന്താരാഷ്ട്ര ഖുര്‍ആന്‍ മത്സരം സംഘടിപ്പിക്കുകയെന്ന ആശയം ഉയര്‍ന്നുവന്നത്. സൗദി ഹജ്, ഔഖാഫ് മന്ത്രാലയം ഇത് ഏറ്റെടുക്കുകയും മക്കയില്‍ പ്രതിവര്‍ഷം മത്സരം സംഘടിപ്പിക്കാന്‍ രാജാവ് അനുമതി നല്‍കുകയുമായിരുന്നു. ഹിജ്‌റ 1414 ല്‍ ഇസ്‌ലാമിക, ഔഖാഫ് മന്ത്രാലയം സ്ഥാപിച്ചതോടെ മത്സരത്തിന്റെ സംഘാടന ചുമതല ഇസ്‌ലാമിക മന്ത്രാലയത്തിലേക്ക് മാറുകയായിരുന്നു.

മത്സരം ഖുർആൻ മനഃപാഠമാക്കാനും മനസ്സിലാക്കാനും പാരായണം ചെയ്യാനും യുവാക്കളെ പ്രോത്സാഹിപ്പിക്കുകയും ഹാഫിസുമാർക്കിടയിൽ മാന്യമായ മത്സരം വളർത്തുകയും ചെയ്യുന്നു. സൗദി അറേബ്യ മത്സരാർഥികളുടെ യാത്രാ ചെലവുകൾ വഹിക്കുകയും, ഖിസ്‌വ നിർമാണ കോംപ്ലക്സ്, മസ്ജിദുന്നബവി, മക്ക-മദീന ചരിത്ര കേന്ദ്രങ്ങൾ എന്നിവ സന്ദർശിക്കാനും ഇമാമുമാരുമായി സംവദിക്കാനും അവസരം നൽകുന്നു.