ന്യൂദല്‍ഹി – പതിനായിരം കോടി രൂപ അധികമായി കടമെടുക്കാന്‍ അനുവദിക്കണമെന്ന കേരളത്തിന്റെ ഹര്‍ജി അഞ്ചംഗ ഭരണഘടനാ ബെഞ്ചിന് വിടാന്‍ സുപ്രീം കോടതിയുടെ നിര്‍ണ്ണായക വിധി. തെരഞ്ഞെടുപ്പ് കാലത്ത് കൂടുതല്‍ വായ്പയെടുത്ത് പെന്‍ഷന്‍ കുടിശ്ശിക അടക്കം വിതരണം ചെയ്യാമെന്ന സംസ്ഥാന സര്‍ക്കാറിന്റെ പ്രതീക്ഷയാണ് ഇതോടെ അസ്തമിച്ചത്. സൂപ്രീം കോടതിയില്‍ കേരളവും കേന്ദ്രവും തമ്മില്‍ നടന്ന രൂക്ഷമായ വാദപ്രതിവാദങ്ങള്‍ക്ക് ശേഷം അനുകൂല വിധിയുണ്ടാകുമെന്ന വിശ്വാസമായിരുന്നു സംസ്ഥാന സര്‍ക്കാറിനുണ്ടായിരുന്നുത്. എന്നാല്‍ സാമ്പത്തിക വിഷയത്തില്‍ കേരളവും കേന്ദ്ര സര്‍ക്കാറും തമ്മിലുള്ള തര്‍ക്കം ഭരണഘടനാ ബെഞ്ച് പരിഗണിക്കട്ടെയയെന്ന തീരുമാനം ഹര്‍ജി പരിഗണിച്ച് ജസ്റ്റിസുമാരായ സൂര്യകാന്ത്, കെ വി വിശ്വനാഥന്‍ എന്നിവരടങ്ങിയ ബെഞ്ച് എടുക്കുകയായിരുന്നു.
ഹര്‍ജിയില്‍ ഉന്നയിച്ച വിഷയങ്ങള്‍ ചര്‍ച്ചയിലൂടെ പരിഹരിക്കാന്‍ കേന്ദ്രത്തിനോടും കേരളത്തിനോടും കോടതി നേരത്തെ നിര്‍ദ്ദേശിച്ചിരുന്നെങ്കിലും ഇതില്‍ ഫലമില്ലാതെ വന്നതോടെയാണ് കേസില്‍ കോടതി വീണ്ടും വാദം കേട്ടത്. ഏഴ് വര്‍ഷം മുമ്പ് സംസ്ഥാന സര്‍ക്കാര്‍ എടുത്ത അധിക കടത്തിന്റെ കണക്കുമായി ബജറ്റ് അവതരണത്തിന്റെ തലേ ദിവസം കേന്ദ്ര സര്‍ക്കാര്‍ എത്തിയതിന് പിന്നില്‍ വേറെ ലക്ഷ്യങ്ങള്‍ ഉണ്ടെന്നാണ് കേരളം വാദിച്ചത്. സംസ്ഥാനത്തിന്റെ സാമ്പത്തിക സ്ഥിതി സംബന്ധിച്ച് തെറ്റായ കണക്ക് സുപ്രീം കോടതിക്ക് കൈമാറിയ കേന്ദ്ര നടപടി ഞെട്ടിച്ചുവെന്നും കേരളം സുപ്രീം കോടതിയില്‍ ചൂണ്ടിക്കാട്ടിയിരുന്നു.
എന്നാല്‍ 2023 -24 സാമ്പത്തിക വര്‍ഷത്തില്‍ ജി എസ് ഡി പി യുടെ 4.25 ശതമാനം ഇത് വരെ കടം കേരളം എടുത്തിട്ടുണ്ട് എന്നും ഇനി 25000 കോടി കൂടി കടമെടുക്കാന്‍ അനുവദിച്ചാല്‍ അത് 7 ശതമാനം കഴിയുമെന്നുമാണ് കേന്ദ്രം വാദിച്ചത്.