തിരുവനന്തപുരം– പോത്തന്‍കോട് സുധീഷിനെ വെട്ടിക്കൊന്ന കേസില്‍ 11 പ്രതികള്‍ക്കും ജീവപര്യന്തം തടവ്. നെടുമങ്ങാട് എസ്.സി/എസ്.ടി കോടതിയാണ് ശിക്ഷ വിധിച്ചത്. പ്രതികളായ സുധീഷ് ഉണ്ണി, ഗുണ്ടാത്തലവന്‍ ഒട്ടകം രാജേഷ്, ശ്യാംകുമാര്‍, നിധീഷ്, നന്ദീഷ്, രഞ്ജിത്, അരുണ്‍, സച്ചിന്‍, സൂരജ്, ജിഷ്ണു പ്രദീപ്, നന്ദു എന്നിവരെയാണ് കോടതി ശിക്ഷിച്ചത്. പ്രതികള്‍ പിഴത്തുകയായ ഒരു ലക്ഷം രൂപ കൊല്ലപ്പെട്ട സുധീഷിന്റെ അമ്മക്ക് നല്‍കണമെന്നും കോടതി വിധിച്ചു.
ചെമ്പകമംഗലം ലക്ഷംവീട് സുധീഷിനെ (35) പാണന്‍വിളയിലെ വീട്ടില്‍ കയറി വെട്ടിക്കൊലപ്പെടുത്തുകയും കാല്‍വെട്ടി മാറ്റി റോഡില്‍ ഉപേക്ഷിക്കുകയും ചെയ്‌തെന്നാണ് കേസ്. 2021 ഡിസംബര്‍ 11നാണ് കൊലപാതകം നടന്നത്. ഗുണ്ടാ സംഘങ്ങള്‍ തമ്മിലുള്ള കുടിപ്പകയാണ് കൊലപാതകത്തിന് പിന്നില്‍. പ്രതികളുടെ ഭീഷണിയെ തുടര്‍ന്ന് സാക്ഷികള്‍ കൂറുമാറിയ കേസില്‍ ശാസ്ത്രീയ തെളിവുകളുടെ അടിസ്ഥാനത്തിലാണ് പ്രോസിക്യൂഷന്‍ കേസ് തെളിയിച്ചത്.