ചാലക്കുടി: വിദ്യാർത്ഥിനിക്കുനേരെ പോലീസ് ലൈംഗികാതിക്രമം നടത്തിയെന്ന് പരാതി. തൃശൂർ ജില്ലയിലെ മലക്കപ്പാറ പോലീസ് സ്റ്റേഷനിലെ സി.പി.ഒ ഷാജുവിനെതിരെയാണ് പരാതി. മുൻ സ്റ്റുഡന്റ് പോലീസ് കേഡറ്റായിരുന്ന വിദ്യാർത്ഥിനിക്കു നേരെ ചാലക്കുടി കെ.എസ്.ആർ.ടി.സി ബസ്റ്റാൻഡിൽ വച്ച് ഇയാൾ ലൈംഗികാതിക്രമം നടത്തിയെന്നാണ് പരാതി.
ഇന്നലെ ഉച്ചയ്ക്ക് 2.30-ഓടെയാണ് സംഭവം. വിദ്യാർത്ഥിനി കോയമ്പത്തൂരിലേക്ക് പോകാനായി ബസ് സ്റ്റാന്റിലെത്തിയപ്പോഴായിരുന്നു സംഭവം. പോലീസുകാരൻ അപമര്യാദയായി പെരുമാറിയതോടെ കുട്ടി ഒച്ചവയ്ക്കുകയായിരുന്നു. കുട്ടിയുടെ കരച്ചിൽ കേട്ട് ആളുകൾ ശ്രദ്ധിക്കുന്നുണ്ടെന്ന് കണ്ടതോടെ ഇയാൾ രക്ഷപ്പെടാൻ ശ്രമിക്കുകയായിരുന്നു. ഇയാൾ ഓട്ടോയിൽ കയറി രക്ഷപ്പെടാൻ ശ്രമിച്ചതോടെ നാട്ടുകാർ ചേർന്ന് ഇയാളെ പിടിച്ചുനിർത്തുകയായിരുന്നു. തുടർന്ന് പോലീസിനെ വിളിച്ചുവരുത്തി നാട്ടുകാർ ഇയാളെ ചാലക്കുടി പോലീസിന് കൈമാറി.