ലണ്ടന്‍: മാഞ്ചസ്റ്റര്‍ യുനൈറ്റഡിന്റെ താല്‍ക്കാലിക കോച്ചായി ചുമതലയേറ്റ റൂഡ് വാന്‍ നിസ്റ്റല്‍റൂയിക്ക് വിജയതുടക്കം. കരാബാവോ കപ്പില്‍ ലെസ്റ്ററിനെതിരേ മിന്നും ജയവുമായാണ് റൂഡ് വാന്‍നിസ്റ്റല്‍ റൂയി വരവറിയിച്ചത്. രണ്ട് ദിവസം മുമ്പാണ് കോച്ച് എറിക് ടെന്‍ഹാഗിനെ മാഞ്ചസ്റ്റര്‍ പുറത്താക്കിയത്. തുടര്‍ന്നാണ് അസിസ്റ്റന്റ് കോച്ച് റൂഡ് വാന്‍ നിസ്റ്റല്‍ റൂയിയെ താല്‍ക്കാലിക കോച്ചായി നിയമിച്ചത്. ഇന്ന് ലെസ്റ്ററിനെതിരേ 5-2നാണ് മാഞ്ചസ്റ്റര്‍ യുനൈറ്റഡ് ജയിച്ചത്.
കാസിമറോയും ബ്രൂണോ ഫെര്‍ണാണ്ടഡസും ചെകുത്താന്‍മാര്‍ക്കായി ഇരട്ടഗോളുകള്‍ നേടി. മറ്റൊരു ഗോള്‍ ഗര്‍ണാഷോയുടെ വകയായിരുന്നു. കാസിമറോ 15, 39 മിനിറ്റുകളിലാണ് സ്‌കോര്‍ ചെയ്തത്. ബ്രൂണോ ഫെര്‍ണാണ്ടസ് 36, 59 മിനിറ്റുകളിലാണ് വലകുലിക്കിയത്. ഗര്‍ണാഷോയുടെ ഗോള്‍ 28ാം മിനിറ്റിലാണ്. ഗര്‍ണാഷോ കാസിമറോയുടെ ഗോളിന് അസിസ്റ്റ് ഒരുക്കുകയും ചെയ്തു.
പ്രീമിയര്‍ ലീഗ് ചാംപ്യന്‍മാരായ മാഞ്ചസ്റ്റര്‍ സിറ്റി 2-1ന് ടോട്ടന്‍ഹാമിനോട് പരാജയപ്പെട്ട് പുറത്തായി. ടോട്ടന്‍ഹാം അവസാന എട്ടില്‍ ഇടം നേടി. ചെല്‍സിയും ന്യൂകാസില്‍ യുനൈറ്റഡിനോട് തോറ്റ് പുറത്തായി. ലിവര്‍പൂള്‍, ക്രിസ്റ്റല്‍ പാലസ്, ആഴ്‌സണല്‍ എന്നിവരും ക്വാര്‍ട്ടറില്‍ ഇടം നേടി.