കൊല്ലം: എ.ഡി.ജി.പിയുടെ ആർ.എസ്.എസ് നേതാക്കളുമായുള്ള കൂടിക്കാഴ്ചയിൽ പ്രതികരിച്ച് എസ്.എൻ.ഡി.പി യോഗം ജനറൽസെക്രട്ടറി വെള്ളാപ്പള്ളി നടേശൻ. എ.ഡി.ജി.പി എം.ആർ അജിത് കുമാർ ഇന്ത്യ ഭരിക്കുന്നവരുടെ പോഷക സംഘടനാ നേതാവിനെ കണ്ടത് മഹാപാപമായി കാണേണ്ടില്ലെന്നും ന്യൂനപക്ഷങ്ങൾ ഇടതുപക്ഷത്തിന്റെ കൈയിൽ നിന്ന് പോയി എന്നത് നേരാണെന്നും അദ്ദേഹം മാധ്യമങ്ങളോട് പ്രതികരിച്ചു.
നിലമ്പൂർ എം.എൽ.എ പി.വി അൻവറിന്റെ വിമർശത്തിലും വെള്ളാപ്പള്ളി പ്രതികരിച്ചു. ഇഷ്ടമില്ലാത്ത അച്ചി തൊട്ടതെല്ലാം കുറ്റം എന്ന രീതിയിലാണ് അൻവറിന്റെ വിമർശം. എന്തായാലും അൻവറിന് പിന്നിൽ കൂടാൻ ആളുകളുണ്ട്. മലബാറിൽ സി.പി.എമ്മിനെ ഭയപ്പെടുത്താൻ അൻവറിന് സാധിക്കും. മലബാറിൽ ഇടതുപക്ഷത്തിനുണ്ടായ തോൽവി അവർ തന്നെ വിലയിരുത്തട്ടെയെന്നും പറഞ്ഞു.
പൂരം കലക്കിയതിൽ ഡി.ജി.പിയുടെ റിപോർട്ട് എ.ഡി.ജി.പിക്ക് എതിരാണ്. മുഖ്യമന്ത്രി എ.ഡി.ജി.പിക്കെതിരെ നടപടി എടുക്കുമെന്ന് വിശ്വസിക്കുന്നയാളാണ് താനെന്നും വെള്ളാപ്പള്ളി പറഞ്ഞു.