റിയാദ്: ബ്രസീലിയന്‍ സൂപ്പര്‍ താരം നെയ്മര്‍ ജൂനിയര്‍ അല്‍ ഹിലാലിനൊപ്പം പരിശീലനം തുടങ്ങി. കഴിഞ്ഞ ദിവസമാണ് താരം സഹതാരങ്ങള്‍ക്കൊപ്പം പരിശീലനത്തില്‍ ഏര്‍പ്പെട്ടത്. ഒരു വര്‍ഷത്തിന് ശേഷമാണ് നെയ്മര്‍ ടീമിനൊപ്പം ചേരുന്നത്. 2023 സീസണില്‍ ക്ലബ്ബിലെത്തിയ താരം ടീമിനൊപ്പം അഞ്ച് മല്‍സരങ്ങള്‍ മാത്രമാണ് കളിച്ചത്.
തുടര്‍ന്ന് കാല്‍മുട്ടിന് പരിക്കേറ്റ നെയ്മര്‍ ശസ്ത്രക്രിയയെ തുടര്‍ന്ന് വിശ്രമത്തിലായിരുന്നു. താരത്തെ ക്ലബ്ബ് ഈ സീസണില്‍ രജിസ്ട്രര്‍ ചെയ്തിരുന്നില്ല. എന്നാല്‍ താരം എന്ന് കളിക്കളത്തിലിറങ്ങുമെന്ന കാര്യം കോച്ച് ജോര്‍ജ്ജ് ജീസസ് വ്യക്തമാക്കിയിട്ടില്ല. സൗദി പ്രൊ ലീഗ് ക്ലബ്ബില്‍ നിലവിലെ ചാംപ്യന്‍മാരാണ് അല്‍ ഹിലാല്‍. ലാറ്റിന്‍ അമേരിക്കന്‍ യോഗ്യതാ മല്‍സരങ്ങളില്‍ ചിലി, പെറു എന്നിവര്‍ക്കെതിരായ ബ്രസീല്‍ സ്‌ക്വാഡില്‍ നെയ്മര്‍ ഉണ്ടാവുമെന്ന അഭ്യൂഹങ്ങള്‍ നിലനില്‍ക്കുന്നുണ്ട്.