ആന്‍ഫീല്‍ഡ്: ഇക്കഴിഞ്ഞ സമ്മര്‍ ട്രാന്‍സ്ഫറില്‍ ലിവര്‍പൂളിന്റെ നടക്കാതെ പോയ ട്രാന്‍സ്ഫറാണ് ബ്രസീലിയന്‍ താരം റൊഡ്രിഗോയുടേത്. റയല്‍ മാഡ്രിഡിന്റെ മിന്നും താരമായ റൊഡ്രിഗോയ്ക്കായി ലിവര്‍പൂള്‍ നേരത്തെ ട്രാന്‍സ്ഫര്‍ വിപണയില്‍ ഇറങ്ങിയിരുന്നു. എന്നാല്‍ റയല്‍ മാഡ്രിഡ് മാനേജ്മെന്റിന്റെ ചില അസ്വാരസ്യങ്ങള്‍ കാരണം കരാര്‍ റദ്ദാവുകയായിരുന്നു. എന്നാല്‍ അടുത്ത സമ്മര്‍ ട്രാന്‍സ്ഫറില്‍ റൊഡ്രിഗോയെ ഏത് വിധേനയും ടീമിലെത്തിക്കാനുള്ള നീക്കം ലിവര്‍പൂള്‍ തുടങ്ങി കഴിഞ്ഞു. 100 മില്ല്യണ്‍ യൂറോയാണ് താരത്തിനായി ലിവര്‍പൂള്‍ മുന്നോട്ട് വച്ചത്.
റയല്‍ ഈ ഓഫര്‍ തള്ളില്ലെന്നാണ് സ്പാനിഷ് മാധ്യമങ്ങള്‍ റിപ്പോര്‍ട്ട് ചെയ്യുന്നത്. 23 കാരനായ റൊഡ്രിഗോ 2019ലാണ് ബ്രസീല്‍ ക്ലബ്ബായ സാന്റോസില്‍ നിന്ന് റയല്‍ മാഡ്രിഡിലേക്ക് ചേക്കേറിയത്. റയലില്‍ വന്നത് മുതല്‍ താരത്തിന് തിരഞ്ഞുനോക്കേണ്ടി വന്നിട്ടില്ല. ലിവര്‍പൂള്‍ സൂപ്പര്‍ താരം ഈജിപ്തിന്റെ മുഹമ്മദ് സലാഹിന്റെ കരാര്‍ 2025ല്‍ അവസാനിക്കും. പ്രായത്തിനെ വെല്ലുന്ന പോരാട്ടവുമായാണ് സലാഹ് ലിവര്‍പൂളില്‍ തുടരുന്നത്. എന്നാല്‍ താരം കരാര്‍ നീട്ടുമോ എന്ന കാര്യം ഇതുവരെ പ്രഖ്യാപിച്ചിട്ടില്ല. സൗദി പ്രൊ ലീഗ് ക്ലബ്ബുകള്‍ ഇതിനോടകം സലാഹിനായി രംഗത്ത് വന്നിരുന്നു. സലാഹ് ക്ലബ്ബ് വിടുകയാണെങ്കില്‍ ലിവര്‍പൂളിന്റെ ഒന്നാമത്തെ ഓപ്ഷനാണ് റൊഡ്രിഗോ.