ആന്‍ഫീല്‍ഡ്: ഇംഗ്ലിഷ് ലീഗ് കപ്പില്‍(കാരബാവോ) ലിവര്‍പൂളിന് വമ്പന്‍ ജയം. വെസ്റ്റ്ഹാമിനെതിരേ 5-1ന്റെ ജയമാണ് ലിവര്‍പൂള്‍ നേടിയത്. ലീഗ് കപ്പിന്റെ മൂന്നാം റൗണ്ടിലാണ് ലിവര്‍പൂളിന്റെ ജയം. മല്‍സരത്തില്‍ ഡീഗോ ജോട്ട യും ഗാക്‌പോയും ഇരട്ട ഗോളുകള്‍ നേടി. മുഹമ്മദ് സലാഹും 74ാം മിനിറ്റില്‍ സ്‌കോര്‍ ചെയ്തു. 25, 49 മിനിറ്റുകളിലാണ് ജോട്ടയുടെ ഗോളുകള്‍ പിറന്നത്. 90ാം മിനിറ്റിലും ഇഞ്ചുറി ടൈമിലുമാണ് ഗാക്‌പോ സ്‌കോര്‍ ചെയ്തത്. ചിയേസ, ജോണ്‍സ്, ന്യൂനസ് എന്നിവര്‍ ഗോളുകള്‍ക്ക് അസിസ്റ്റ് ഒരുക്കി.
ആന്‍ഫീല്‍ഡില്‍ നടന്ന മല്‍സരത്തില്‍ 21ാം മിനിറ്റില്‍ ചെമ്പടയുടെ ക്യാനസിന്റെ സെല്‍ഫ് ഗോളിലൂടെ വെസ്റ്റ്ഹാം മുന്നിലെത്തുകയായിരുന്നു. 76ാം മിനിറ്റില്‍ ആല്‍വാരസ് ചുവപ്പ് കാര്‍ഡ് കണ്ട് പുറത്തായതും വെസ്റ്റ്ഹാമിന് തിരിച്ചടിയായി. നാലാം റൗണ്ടിലെ ലിവര്‍പൂളിന്റെ എതിരാളി ബ്രിങ്ടണ്‍ ആണ്. മറ്റൊരു മല്‍സരത്തില്‍ ആഴ്‌സണല്‍ ബോള്‍ട്ടണ്‍ വണ്‍ണ്ടേഴ്‌സിനെ 5-1ന് പരാജയപ്പെടുത്തി. റൈസ്, ടീനേജ് താരം നവ്‌നേരി(ഇരട്ട ഗോള്‍), സ്‌റ്റെര്‍ലിങ്, കായ് ഹാവര്‍ട്ട്‌സ് എന്നിവര്‍ ആഴ്‌സണലിനായി സ്‌കോര്‍ ചെയ്തത്.
സ്പാനിഷ് ലീഗില്‍ ഗെറ്റാഫെയെ ഏകപക്ഷീയമായ ഒരു ഗോളിന് പരാജയപ്പെടുത്തി ബാഴ്‌സലോണ ലീഗില്‍ തലപ്പത്ത് തുടരുന്നു. ജയത്തോടെ നാല് പോയിന്റിന്റെ ലീഡാണ് ബാഴ്‌സയ്ക്കുള്ളത്. റോബര്‍ട്ടോ ലെവന്‍ഡോസ്‌കിയാണ് ബാഴ്‌സയ്ക്കായി സ്‌കോര്‍ ചെയ്തത്.