തിരുവനന്തപുരം: കേരളാ ക്രിക്കറ്റ് ലീഗില്‍ ഇന്ന് നടന്ന മല്‍സരങ്ങളില്‍ തിരുവനന്തപുരം റോയല്‍സിനും കാലിക്കറ്റ് ഗ്ലോബ്‌സ്റ്റാര്‍സിനും ജയം.ക്യാപ്റ്റന്‍ അബ്ദുല്‍ ബാസിത്തിന്റെ ഓള്‍റൗണ്ട് മികവില്‍ കൊച്ചി ബ്ലൂ ടൈഗേഴ്സിനെതിരേ തിരുവനന്തപുരം റോയല്‍സിന് ജയം. കൊച്ചിയില്‍ നടന്ന ആദ്യ മല്‍സരത്തില്‍ ആദ്യം ബാറ്റുചെയ്ത കൊച്ചി ബ്ലൂ ടൈഗേഴ്സ് നിശ്ചിത 20 ഓവറില്‍ 131-ന് പുറത്തായി.
മറുപടി ബാറ്റിങ്ങിനിറങ്ങിയ തിരുവനന്തപുരം റോയല്‍സ് ഒരുപന്ത് ബാക്കിനില്‍ക്കേ ലക്ഷ്യം മറികടന്നു. സ്‌കോര്‍: കൊച്ചി ബ്ലൂ ടൈഗേഴ്സ്-131/10 (20 ഓവര്‍). തിരുവനന്തപുരം റോയല്‍സ്-135/5 (19.5 ഓവര്‍). ഓള്‍ റൗണ്ടിങ് പ്രകടനം നടത്തിയ ക്യാപ്റ്റന്‍ ബാസിത്താണ് മല്‍സരത്തിലെ താരം. അബ്ദുല്‍ ബാസിത്ത് മൂന്ന് വിക്കറ്റെടുക്കുകയും 50 റണ്‍സ് നേടുകയും ചെയ്തു. തിരുവനന്തപുരത്തിനായി വിനോജ് കുമാര്‍ നാല് വിക്കറ്റ് നേടി.
തിരുവനന്തപുരത്ത് നടന്ന രണ്ടാം മല്‍സരത്തില്‍ ആലപ്പി റിപ്പിള്‍സിനെയാണ് കാലിക്കറ്റ് ഗ്ലോബ്‌സ്റ്റാര്‍സ് പരാജയപ്പെടുത്തിയത്. ആദ്യം ബാറ്റ് ചെയ്ത ആലപ്പി റിപ്പിള്‍സിനെ കാലിക്കറ്റ് 90 റണ്‍സിനു പുറത്താക്കി. മറുപടി ബാറ്റിങില്‍ കാലിക്കറ്റ് 11.5 ഓവറില്‍ നാലു വിക്കറ്റ് നഷ്ടത്തില്‍ വിജയം നേടി. ലീഗിലെ ആദ്യ ഹാട്രിക്കിന് കാലിക്കറ്റിന്റെ അഖില്‍ദേവ് അര്‍ഹനായി. കാലിക്കറ്റിന്റെ അജിത് വാസുദേവനാണ് പ്ലയര്‍ ഓഫ് ദ മാച്ച്.