കൊച്ചി: അമ്മയുടെ നേതൃത്വത്തിൽ ഇരുന്നപ്പോഴുണ്ടായ വിവാദങ്ങൾ മനസ് വേദനിപ്പിച്ചുവെന്ന് നടൻ മോഹൻലാൽ. എല്ലാവർക്കും നന്ദി, പുതിയ നേതൃത്വം ഉണ്ടാകുമെന്നാണ് ശുഭപ്രതീക്ഷ. വിമർശിച്ചതിനും തിരുത്തിയതിനും നന്ദിയെന്നും അമ്മ ഭരണസമിതി പിരിച്ചുവിട്ടുള്ള രാജിക്കത്തിൽ മോഹൻലാൽ കുറിച്ചു.
ഹേമ കമ്മിറ്റി റിപോർട്ടിന് പിന്നാലെയാണ് അമ്മയിലെ ഉത്തരവാദപ്പെട്ട ഭാരവാഹികൾക്കെതിരേ നടിമാർ ലൈംഗികാരോപണങ്ങൾ ഉന്നയിച്ചത്. തുടർന്ന് പലർക്കും രാജിവെക്കേണ്ടിയും വന്നു. കുറ്റക്കാർക്കെതിരെ മുഖം നോക്കാതെ നടപടി വേണമെന്നും അമ്മക്ക് വീഴ്ച പറ്റിയെന്നും പല സഹഭാരവാഹികളും താരങ്ങളും കടുത്ത വിമർശം ഉന്നയിക്കുകകൂടി ചെയ്തതോടെ സംഘടന ആടിയുലയുകയായിരുന്നു.
ഇന്ന് ചേർന്ന ഓൺലൈൻ എക്‌സിക്യൂട്ടീവ് യോഗത്തിൽ അഭിപ്രായ ഭിന്നത കൊടുമുടിയിൽ എത്തുകയും അവസാനം സംഘടന പിരിച്ചുവിടൽ പൊട്ടിത്തെറിയിൽ കലാശിക്കുകയുമായിരുന്നു. ലൈംഗിക വിവാദത്തെ തുടർന്ന് അമ്മ ജനറൽസെക്രട്ടറിയായിരുന്ന നടൻ സിദ്ദിഖിനും ചലച്ചിത്ര അക്കാദമി ചെയർമാൻ രഞ്ജിത്തിനും അടക്കം സ്ഥാനങ്ങളിൽനിന്ന് രാജിവെക്കേണ്ടി വന്നെങ്കിലും ഈ വിവാദങ്ങളിലൊന്നും പ്രതികരിക്കാതെ മൗനം പാലിച്ചിരിക്കുകയായിരുന്നു അമ്മ പ്രസിഡന്റ് കൂടിയായ മോഹൻലാൽ. ഇന്ന് രാജിക്കത്തിൽ ‘ധാർമ്മികമായ ഉത്തരവാദിത്വം മുൻനിർത്തി രാജി വെയ്ക്കുന്നുവെന്നാണ്’ മോഹൻലാൽ അറിയിച്ചത്. ഓഫിസ് പ്രവർത്തനങ്ങൾ ഏകോപിപ്പിക്കാനും മറ്റ് കാര്യങ്ങൾക്കുമായി നിലവിലുള്ള ഭരണസമിതി താത്കാലിക സംവിധാനമായി തുടരുമെന്നും അദ്ദേഹം അറിയിച്ചിട്ടുണ്ട്.
മോഹൻലാലിന്റെ രാജിക്കത്തിന്റെ പൂർണരൂപം ഇങ്ങനെയാണ്:
ഹേമാ കമ്മിറ്റി റിപ്പോർട്ട് പുറത്തു വന്നതിനെ തുടർന്ന് സാമൂഹ്യദൃശ്യഅച്ചടി മാധ്യമങ്ങളിൽ ‘അമ്മ’സംഘടനയിലെ ഭരണ സിമിതിയിലെ ചില ഭാരവാഹികൾ നേരിടേണ്ടി വന്ന ലൈംഗികാരോപണങ്ങളുടെ പശ്ചാത്തലത്തിൽ, ‘അമ്മ’യുടെ നിലവിലുള്ള ഭരണ സമിതി അതിന്റെ ധാർമ്മികമായ ഉത്തരവാദിത്വം മുൻനിർത്തി രാജി വെയ്ക്കുന്നു.
രണ്ട് മാസത്തിനുള്ളിൽ പൊതുയോഗം കൂടി, പുതിയ ഭരണ സമിതിയെ തെരെഞ്ഞെടുക്കും. ‘അമ്മ’ ഒന്നാം തീയതി നല്കുന്ന കൈനീട്ടവും ആരോഗ്യ ചികിത്സയ്ക്ക് നൽകിപ്പോരുന്ന സഹായവും ‘അമ്മ’യുടെ സമാദരണീയരായ അംഗങ്ങൾക്ക് തടസ്സം കൂടാതെ ലഭ്യമാക്കാനും പൊതുയോഗം വരെ ഓഫിസ് പ്രവർത്തനങ്ങൾ ഏകോപിപ്പിക്കാനും നിലവിലുള്ള ഭരണ സമിതി താത്ക്കാലിക സംവിധാനമായി തുടരും.
‘അമ്മ’യെ നവീകരിക്കാനും, ശക്തിപ്പെടുത്തുവാനും കെല്പുള്ള പുതിയൊരു നേതൃത്വം ‘അമ്മ’യ്ക്കുണ്ടാവുമെന്ന ശുഭപ്രതീക്ഷയിലാണ് ഞങ്ങൾ. എല്ലാവർക്കും നന്ദി, വിമർശിച്ചതിനും തിരുത്തിയതിനും.