ന്യൂഡൽഹി: എ.ഐ.സി.സി ജനറൽ സെക്രട്ടറി പ്രിയങ്കാ ഗാന്ധി, അംബാനി കുടുംബത്തിലെ ആഡംബര വിവാഹത്തിൽ പങ്കെടുത്തുവെന്ന ബി.ജെ.പി എം.പിയുടെ ആരോപണത്തിൽ പ്രതികരണവുമായി കോൺഗ്രസ് രംഗത്ത്.
ബി.ജെ.പി നേതാവ് നിശികാന്ത് ദുബെയാണ് ലോക്‌സഭയിൽ പ്രിയങ്കയ്‌ക്കെതിരെ ഇത്തരമൊരു ആരോപണം ഉന്നയിച്ചത്. എ.എ ബിസിനസ് ഗ്രൂപ്പിനെതിരെ എപ്പോഴും കോൺഗ്രസ് ആരോപണം ഉന്നയിക്കുമെങ്കിലും അവരുടെ ജനറൽ സെക്രട്ടറി പ്രിയങ്ക, അംബാനിയുടെ വിവാഹത്തിൽ പങ്കെടുക്കാൻ പോയെന്നായിരുന്നു നിശികാന്തിന്റെ ആരോപണം.
എന്നാൽ, ഇത് വസ്തുതകളുമായി പൊരുത്തപ്പെടുന്നില്ലെന്നാണ് കോൺഗ്രസ് മറുപടി. അനന്ത് അംബാനിയുടെ വിവാഹ സമയത്ത് പ്രിയങ്ക ഗാന്ധി ഇന്ത്യയിൽ പോലും ഉണ്ടായിരുന്നില്ലെന്ന് പാർട്ടി നേതാവ് സുപ്രിയ ശ്രീനാഥെ പ്രതികരിച്ചു. ലോകസഭയിലെ നിശികാന്തിന്റെ ആരോപണം ചർച്ചയായതോടെയാണ് കോൺഗ്രസ് സത്യാവസ്ഥ വിശദീകരിച്ച് രംഗത്തെത്തിയത്.
‘ബി.ജെ.പിയുടെ ഈ പ്രചാരണം തീർത്തും തെറ്റാണ്. പ്രിയങ്ക വിവാഹത്തിൽ പങ്കെടുത്തിട്ടില്ല. ആ സമയം അവർ ഇന്ത്യയിയിൽ പോലും ഉണ്ടായിരുന്നില്ല. ആഭ്യന്തരമന്ത്രിയ്ക്ക് ഇക്കാര്യം അറിയാം. എല്ലാവരെയും നിരീക്ഷിക്കുന്ന പഴയൊരു മോശം ശീലം അദ്ദേഹത്തിനുണ്ടെന്നും സുപ്രിയ വ്യക്തമാക്കി.
വ്യാജ ബിരുദമുള്ള ബി.ജെ.പി എം.പിയ്ക്ക് നുണപറയുന്ന ശീലമുണ്ടെന്നും ഇതുവരെ പ്രിയങ്കാ ഗാന്ധി ലോകസഭാംഗം കൂടിയായിട്ടില്ലെന്നും സുപ്രിയ ഓർമിപ്പിച്ചു.
