സിഡ്നി– വിഖ്യാത ചലച്ചിത്ര പരമ്പരയായ ‘ജുറാസിക് പാർക്കിലെ’ ശാസ്ത്രജ്ഞന്റെ വേഷത്തിലൂടെ ലോകമെമ്പാടുമുള്ള സിനിമാപ്രേമികളുടെ മനസ്സിലിടം നേടിയ ന്യൂസിലൻഡ് നടൻ സാം നീൽ (78) അന്തരിച്ചു. സിഡ്നിയിലായിരുന്നു അന്ത്യം. മരണവാർത്ത അദ്ദേഹത്തിന്റെ കുടുംബം സാമൂഹിക മാധ്യമങ്ങളിലൂടെ സ്ഥിരീകരിച്ചു. അപ്രതീക്ഷിതമായിരുന്നു മരണമെങ്കിലും അദ്ദേഹം രക്താർബുദത്തിൽ നിന്ന് പൂർണ്ണമായും വിമുക്തനായിട്ടാണ് വിടവാങ്ങിയതെന്ന് കുടുംബം അറിയിച്ചു. കടുത്ത രോഗബാധിതനായിരുന്ന അദ്ദേഹം കൃത്യമായ ചികിത്സയ്ക്ക് ശേഷം കഴിഞ്ഞ ഏപ്രിൽ മാസത്തിലാണ് രോഗമുക്തനായ വിവരം ജനങ്ങളെ അറിയിച്ചിരുന്നത്.
അഞ്ചു പതിറ്റാണ്ടിലേറെ നീണ്ട അഭിനയജീവിതത്തിൽ അമ്പതിലധികം ചിത്രങ്ങളിൽ അദ്ദേഹം വേഷമിട്ടിട്ടുണ്ട്. ഏത് തരം കഥാപാത്രങ്ങളെയും തന്മയത്വത്തോടെ അവതരിപ്പിക്കാൻ കഴിയുന്ന മികച്ച നടനെന്നാണ് സിനിമാ ലോകം അദ്ദേഹത്തെ വിലയിരുത്തിയിരുന്നത്. ‘ദി ഹണ്ട് ഫോർ റെഡ് ഒക്ടോബർ’, ‘ഓമൻ III’, ഓസ്കാർ പുരസ്കാരം നേടിയ ‘ദി പിയാനോ’, ‘ഈവിൾ ഏഞ്ചൽസ്’ തുടങ്ങി നിരവധി വൈവിധ്യമാർന്ന ചിത്രങ്ങളിലെ അദ്ദേഹത്തിന്റെ പ്രകടനം ഏറെ പ്രശംസ പിടിച്ചുപറ്റിയിരുന്നു.
വടക്കൻ അയർലൻഡിൽ ജനിച്ച അദ്ദേഹം, തന്റെ ഏഴാം വയസ്സിലാണ് പിതാവിനൊപ്പം ന്യൂസിലൻഡിലേക്ക് കുടിയേറിയത്. നൈജൽ എന്നായിരുന്നു ആദ്യ പേരെയെങ്കിലും സ്കൂൾ കാലഘട്ടത്തിൽ അദ്ദേഹം സ്വന്തം പേര് ‘സാം’ എന്ന് മാറ്റുകയായിരുന്നു. സ്കൂൾ നാടകങ്ങളിലൂടെ അഭിനയരംഗത്തേക്ക് കടന്നുവന്ന അദ്ദേഹത്തിന് 1977-ൽ പുറത്തിറങ്ങിയ ‘സ്ലീപ്പിങ് ഡോഗ്സ്’ എന്ന ചിത്രമാണ് വഴിത്തിരിവായത്. പിന്നീട് ഹോളിവുഡ് ചിത്രങ്ങളിൽ അദ്ദേഹം സജീവമായി. 2016-ൽ പുറത്തിറങ്ങിയ ‘ഹണ്ട് ഫോർ ദി വൈൽഡർ പീപ്പിൾ’ എന്ന ചിത്രത്തിലെ വേഷം ജന്മനാട്ടിൽ അദ്ദേഹത്തെ ഏറെ ജനപ്രിയനാക്കി.
അഭിനയ മികവിന് അന്താരാഷ്ട്ര തലത്തിൽ നിരവധി പുരസ്കാര നാമനിർദ്ദേശങ്ങൾ ലഭിച്ചിട്ടുള്ള അദ്ദേഹം ഓസ്ട്രേലിയൻ ടെലിവിഷൻ പുരസ്കാരങ്ങളും സ്വന്തമാക്കിയിട്ടുണ്ട്. കലാരംഗത്തെ സമഗ്ര സംഭാവനകൾ പരിഗണിച്ച് രാജ്യം അദ്ദേഹത്തിന് സർ പദവി (നൈറ്റ്ഹുഡ്) നൽകി ആദരിച്ചിരുന്നു.